Níu stiga sigur Keflvíkinga

Keflvíkingar tróna á toppnum í Intersport-deildinni í körfubolta með 28 stig en Keflavík sigraði KR, 88-79, í gær. Nick Bradford var stigahæstur í liði Keflavíkur með 25 stig og Magnús Gunnarsson skoraði 22. Araon Harper var stigahæstur KR-inga með 26 stig. Haukar unnu loks sigur en þeir lögðu ÍR, 107-73, sannfærandi sigur Hauka á heimavelli. Nýliðinn Demetric Shaw var frískur í liði Hauka og skoraði 29 stig rétt eins og Mike Manciel. Theo Dixon var stigahæstur ÍR-inga með 20 stig. Grindavík vann Tindastól á Sauðárkróki, 103-102. Brian Thompson var stigahæstur í liði Stólanna með 24 stig en Darrel Lewis skoraði 34 stig fyrir Grindavík. Leik KFÍ og Snæfells var frestað. Þá var einn leikur í 1. deild karla; Breiðablik vann Þór Þorlákshöfn, 80-59.