Ríkis­stjóri Texas í her­ferð gegn þvottastöðvum múslima á flug­völlum

Rýmin, sem er að finna á Dallas-Fort Worth International Airport og George Bush Intercontinental Airport í Houston, eru notuð af múslimum til að þvo andlit sín, hendur og fætur áður en þeir biðja.

Ríkisstjórinn, Greg Abbott, hefur gagnrýnt að flugvellirnir bjóði upp á þessa „þjónustu“ og segir óforsvaranlegt að vera með sérstakt rými fyrir einn trúarhóp sem aðrir hafa ekki aðgang að.

Hann bendir á að munur sé á umræddum rýmum og almennum bænarýmum sem finna má á mörgum stórum flugvöllum. Þar séu allir trúarhópar velkomnir.

Abbott, sækist nú eftir endurkjöri í fjórða sinn, og hefur þegar farið þess á leit við samgönguyfirvöld að þau leggi flugvöllunum ekki til meira fjármagn fyrr en þvottastöðvunum hefur verið lokað. 

Stjórnendur Dallas-Fort Worth vallarins ákváðu í kjölfarið að hætta við fjölgun rýmanna, eins og til hafði staðið.

Leiðtogar múslima hafa hafnað þeim málatilbúnaði Abbot að með þvottastöðvunum sé mismunað gegn þeim sem ekki eru múslimar. Um sé að ræða nýjasta útspilið í herferð Repúblikanaflokksins gegn múslimum.