Önnur lestin af sporinu á innan við sólar­hring

Lestin var á vegum lestarsamgangna Stór-Anglíu og var á leið frá Southend Victoria til Liverpool-götu í Lundúnum þegar hún fór út af sporinu upp úr tvö að staðartíma. Öllum ferðum á svæðinu var í kjölfarið aflýst.

Þessi lest fór út af sporinu innan við sólarhring eftir að önnur lest fór út af sporinu í Austur-Sussex þar sem tveir farþegar slösuðust alvarlega.

Ógurlegar sveiflur

Jon Young, farþegi um borð, lýsir atvikinu sem skelfilegri lífsreynslu.

„Lestin sveiflaðist ógurlega í um tíu sekúndur, eins og hún ætlaði að velta. Svo hélt hún áfram í nokkrar mínútur í viðbót en það heyrðist hræðilegt titrandi hljóð,“ segir hann í samtali við breska ríkisútvarpið.

Young segir að reyk hafi lagt inn í aftasta vagninn og að fólk hafi hlaupið um í ofboði.

Ringulreið myndaðist einnig á Southend-flugvelli, sem er á sömu lestarleið. Fréttamaður BBC á svæðinu, sem sjálfur var nýlentur úr fríi, sagði fjölda farþega ekki komast áfram frá lestarstöðinni.

Sjúkraþyrla lenti í varúðarskyni skammt frá slysstaðnum, auk þess sem lögregla, slökkvilið og sjúkraflutningamenn voru kölluð út. Rannsóknarnefnd járnbrautarslysa sendi jafnframt rannsóknarteymi á staðinn til að afla gagna.

Kanna þátt hitans

Samkvæmt BBC fannst vel fyrir titringi í nágrenninu og bæjarbúum brá í brún við hávaðann. Íbúar á svæðinu komu margir á vettvang slyssins og færðu viðbragðsaðilum vatnsflöskur og ísa þar sem þeir voru að störfum í miklum hita.

Martin Frobisher hjá Network Rail segir sumarhitann hafa reynt verulega á lestarkerfið. Mark Francois, þingmaður Íhaldsflokksins fyrir Rayleigh og Wickford, segir að rannsóknin muni sérstaklega kanna hvort veðrið hafi átt þátt í slysinu.

 Samgönguráðuneytið breska ítrekaði í viðbrögðum sínum við atvikinu að lestarkerfi Bretlands væri með þeim öruggustu í heimi og að lestarslys sem þessi væru afar sjaldgæf.