Elísa með met í fyrsta hlaupinu eftir mánuð í meiðslum

Fálkinn er nítján kílómetra stígahlaup með 530 metra hækkun en Súlur er 29 kílómetra fjallahlaup með 1410 metra hækkun.

Sigurjón Ernir kláraði sitt 29 kílómetra hlaup á tveimur klukkutímum, 25 mínútum og 10 sekúndum. Hann var rúmum fimm mínútum á undan Halldóri Hermanni Jónssyni sem varð annar. Grétar Örn Guðmundsson var svo þriðji. Gamla metið átti Snorri Björnsson sem kláraði Súlurnar á 2:25:59 klst árið 2023.

Sigþóra Brynja Kristjánsdóttir kom fyrst kvenna í mark í Súlum á tímanum 3 klukkutímum, 3 mínútum og 12 sekúndum.

Einar Árni Gíslason kláraði Fálkann á einum klukkutíma, sautján mínútum og 30 sekúndum og kláraði meira en þremur mínútum á undan Ásgeiri Daða Þórissyni. Árni Björn Höskuldsson varð þriðji. Fyrrnefndur Sigurjón Ernir missti þarna metið sitt en hann var tíu sekúndum lengur með Fálkann árið 2023.

Elísa Kristinsdóttir kláraði Fálkann á einum klukkutíma, 23 mínútum og 32 sekúndum og kláraði tæpum þremur mínútum á undan Fanneyju Guðmundsdóttur. Katla Rut Róbertsdóttir Kluvers varð þriðja. Gamla metið átti Íris Anna Skúladóttir sem hljóp Fálkann á einum klukkutíma, 23 mínútum og 58 sekúndum árið 2023.

Elísa var tekin í viðtal á samfélagsmiðlum hlaupsins eftir að hún kom í mark og spurð hvernig henni liði. „Bara mjög vel og bara geggjað að vera komin hingað og fá að hlaupa. Þetta var bara æðislegt, mjög gaman,“ sagði Elísa en bjóst hún við meti?

„Það var alveg markmiðið en ég var að horfa á 1: 25 og er aðeins undir því. Þannig að það er bara geggjað. Í rauninni vissi ég ekki neitt því ég er að koma úr meiðslum. Þetta er fyrsta hlaupið í bráðum mánuði og bara geggjað að sjá að formið er enn þá til staðar,“ sagði Elísa.

Þetta er annað árið í röð sem hún setur brautarmetið en stórkostlegt met hennar í Gyðjunni frá því í fyrra stendur enn en hún kláraði Gyðjuna á 10:45:17 klst. fyrir ári síðan.

Aðalheiður Aðalsteinsdóttir kom fyrst kvenna í mark í Tröllinu í ár á tímanum 5:10:30 klst. en Guðlaugur Ari Jónsson varð fyrstur hjá körlunum á 04:15:53 klst.

Þorbergur Ingi Jónsson var fyrstur karla í mark í Gyðjunni á tímanum 10:34:22 klst. en Hildur Aðalsteinsdóttir kom fyrst kvenna í mark í Gyðjunni.

Hér fyrir ofan og neðan má sjá nýju methafana koma í mark.