„Ég er oftast mjög ró­legur“

„Þetta var bara mjög jafnt hérna í lokin. Við vorum komnir með gott forskot en misstum það niður. Sindri gerði rosalega vel í því að koma til baka. Við réðum náttúrulega bara ekkert við bakvörðinn hjá þeim, Kaleb,“ segir Jakob Örn eftir leik og þar er engu logið.

Kaleb Wiggins setti heil 47 stig og var aðeins einu frákasti frá þrefaldri tvennu í ofanálag.

En hvað skilaði KR sigrinum?

„Bara það að hafa spilað vel í öðrum og þriðja leikhluta og að hafa náð að byggja upp svolítið forskot. Það er alltaf gott en getur verið hættulegt þegar forskotið fer að minnka og minnka. Það getur myndast svolítið stress en við gerðum vel í lokin, Roberts setti stóran þrist fyrir okkur og settum svo vítin okkar. Það er líka bara gott próf að geta klárað svona leiki,“ segir Jakob sem segist ekki hafa verið sélega stressaður.

„Taugarnar voru bara ágætar. Ég er oftast mjög rólegur. Ég hef séð þetta allt áður.“

KR er eftir sigur kvöldsins með fullt hús eftir fjóra leiki. Þeir hafa unnið Grindavíkurlið sem var enn að púsla sér saman í upphafi móts, meiðslum hrjátt lið Njarðvíkur, auk heimasigra á Ármanni og Sindra.

Hafa KR-ingar verið heppnir með uppröðun leikja í upphafi móts?

„Við höfum klárlega átt auðveldara prógram en mörg önnur lið í deildinni. Það segir sig sjálft. Hálft Grindavíkurlið, hálft Njarðvíkurlið og svo heimaleikir við Ármann og Sindra. En það þarf að vinna þessa leiki. Við höfum oft flaskað á því áður sjálfir að tapa svona leikjum sem mér finnst við eigum að vinna. Það er sterkt að ná í þessa sigra. Þeir munu skipta máli í lokin og núna koma bara fullmönnuð lið og betri lið og við þurfum að mæta klár gegn þeim og sjá betur hvar við stöndum,“ segir Jakob en KR sækir annað taplaust lið í Álftanesi heim í næstu umferð.