Dæmdur í fangelsi fyrir að hrella fyrr­verandi kærustu

Asad Hussain, búsettur nærri Manchester í Bretlandi, hefur verið dæmdur í átta ára fangelsi fyrir að sitja um konu sem olli henni alvarlegum ótta, líkamsárás og fyrir að hafa ekki farið að fyrirmælum lögreglu.

Hussain og konan hittust fyrst í apríl 2024 og notaði hann falska nafnið Mick Renney. Að sögn lögreglunnar í Cheshire fóru þau á nokkur stefnumót en Hussain varð sífellt stjórnsamari. Hún sleit sambandinu eftir að hún komst að því að hann hefði tekið síma hennar og lesið skilaboð.

Þá elti Hussain hana inn á baðherbergi og bannaði henni að nota símann án þess að hann sjálfur væri viðstaddur. Konan hafi reynt að loka dyrunum en hann ýtt henni og fellt. Í kjölfar sambandsslitanna sendi Hussain skilaboð á dóttur konunnar og sakaði hana um framhjáhald.

Nei þýddi að „hún vildi það meira“

Í júlí það sama ár byrjuðu ókunnugir menn að mæta heim til konunnar og sögðu þeir að þeir hefðu rætt við hana á stefnumótaforritinu Tinder og hún boðið þeim heim. Í raun hafði Hussain búið til aðgang undir hennar nafni, spjallað við karlmenn og sagt þeim að hana dreymdi um að taka þátt í svokallaðri „nauðgunarfantasíu“.

Þá sagði Hussian mönnunum, í nafni konunnar, að þeir ættu að koma heim til hennar. Ef hún segði nei þýddi það að „hún vildi það meira“. Að minnsta kosti átján menn komu að heimili konunnar.

Konan tilkynnti Hussain til lögreglu en hún taldi hann enn heita Mick Renney. Það var ekki fyrr en lögreglan komst yfir bílnúmeraplötu hans að þeir komust að því hvað hann hét í raun. Hussain var handtekinn þann 6. október.

Sat í þriggja kílómetra fjarlægð

„Enginn hefur rétt til að láta mér líða óöruggri á mínu eigin heimili bara af því að ég vil ekki vera lengur í sambandi með honum,“ sagði í yfirlýsingu konunnar sem lesin var fyrir dómi.

„Nei á að þýða nei. Núna velti ég fyrir mér hversu margir menn hafa heimilisfangið mitt og trúa því að ég vilji verða fyrir kynferðislegri árás, eða þaðan af verra.“

Hussain neitaði öllum sökum en lá fyrir dómnum að tæki sem hann notaði hefði verið notað til að stofna Tinder-aðganginn. Í ljós kom að í hvert skipti sem reikningarnir voru virkir hafði hann setið um þremur kílómetrum frá heimili konunnar tímunum saman og sent skilaboð.

„Þetta hefur verið eitt flóknasta og óhugnanlegasta eltihrellismál sem lögreglan í Cheshire hefur nokkru sinni rannsakað,“ sagði Keith Terrill, rannsóknarlögreglumaður, eftir dómsuppkvaðninguna.

„Það hefur hins vegar enn og aftur sýnt að internetið veitir þeim sem vilja beita konur og stúlkur ofbeldi og heimilisofbeldi ekkert skjól.“