„Ég er alltaf í slags­málum“

„Það er enginn tími til þess að svekkja sig eða vera í leiðindum. Núna er bara að fletta blaðsíðunni og taka það næsta,“ segir Tryggvi sem segir gott að hafa stutt á milli leikja til að svara fyrir tapið í fyrsta leik.

Fast var tekið á Tryggva í leiknum og skiptust Ísraelarnir á við að brjóta á honum, oft heldur harkalega. Í eitt skiptið líktist það frekar varnarleik í handbolta þar sem honum var hent í jörðina líkt og rætt var um í Besta sætinu.

Tryggvi kveðst öllu vanur.

„Ég er alltaf í slagsmálum. Það er mitt djobb. Ég lýg því ekki að ég sé ekki smá þreyttur í dag en sem betur fer er enn smá í leikinn. Ég verð hress og klár í leikinn á morgun,“ segir Tryggvi. En verður þetta þá svona allt mótið, að hann verði tekinn svo föstum tökum?

„Það má alveg reikna með því. Menn vita að ég er í þessum slagsmálum og þeir taka á móti mér þannig. Ég mun halda áfram að berjast á sama hátt og þetta verður svona áfram. Maður þarf bara að taka því,“ segir Tryggvi.

Tryggvi fékk örlitla hvíld í gær, allt þar til í lok leiks þegar öllu byrjunarliðinu var skipt út í ruslatímanum er ljóst var að Ísrael ynni sigur. En treystir hann sér í að spila hátt í 40 mínútur í hverjum leik?

„Ég mun spila það sem ég þarf að spila. Ef það er spurning um að ég spili 40 mínútur og við vinnum, þá geri ég það. Ef ég þarf að spila 15 mínútur og við vinnum geri ég það líka,“ segir Tryggvi.

Hann er þá spenntur að komast aftur út á parketið og mæta Belgum á morgun.

„Við höfum rennt ágætlega yfir belgíska liðið. Það var gott að við spiluðum snemma í gær, því höfum við haft tíma í að pæla í hinum. Við horfðum á leikinn þeirra og vitum hverjum við búumst við á móti þeim. Æfingin í dag var góð og það er strax komin góð tilfinning í liðið,“ segir Tryggvi.

Fleira kemur fram í viðtalinu sem má sjá í spilaranum að ofan.

Ísland mætir Belgíu klukkan 12:00 á morgun og verður leiknum lýst beint í textalýsingu á Vísi.