Komst ekki í golf í gær en skellti sér í morgun

Gísli Freyr Valdórsson, stjórnandi Þjóðmála og fyrrverandi aðstoðarmaður Hönnu Birnu Kristjánsdóttur, birti síðdegis í gær skjáskot af appinu Golfbox á samfélagsmiðlinum X. 

Þar mátti sjá upplýsingar um  að Hanna Katrín og kona hennar, Ragnhildur Sverrisdóttir, hefðu verið með rástíma í golfi klukkan 14:30 fyrr um daginn. Í ummælum við færsluna skrifaði annar X-verji að þær Hanna og Ragnhildur ættu aftur tíma í dag klukkan 9:30. Ráðherrann var því með rástíma í golf tvo daga í röð.

Einn af nafnlausum pistlahöfundum Viðskiptablaðsins, Huginn og Muninn, skrifaði í kjölfarið pistilinn „Hið ljúfa líf skattamálaráðherrans“ þar sem sagði að Hanna Katrín léti ekki „ráðherrajobbið og þingstörfin stoppa sig í að fara í golf á miðjum vinnudegi“.

Ekki sama að skrá sig og mæta

„Það er ekki hið sama að skrá sig í golf og ná að mæta. Það varð ekkert úr golfi hjá okkur Hönnu Katrínu í dag. Hún hafði öðru að sinna. Kannski komumst við í fyrramálið. Ég væri kát með það, enda sjálf í fríi, eins og stóð reyndar til hjá okkur báðum,“ skrifaði Ragnhildur Sverrisdóttir, kona Hönnu, undir Facebook-deilingu Viðskiptablaðsins á pistlinum.

Vísir hefur reynt að ná í ráðherra og aðstoðarmann hans í síma bæði í gærkvöldi og nú í morgun. Á endanum svaraði ráðherrann í textaskilaboðum rétt fyrir rástímann klukkan 9:30: „Ég gat því miður ekkki nýtt mér tímann í gær. Ætla að reyna að að stökkva níu holur núna. Vona að mér verði ekki hent burt vegna of margra símtala.“

Vísir hefur ekki náð frekara sambandi við ráðherrann en hringurinn í Borgarnesi hófst klukkan 9:30. Þingfundur hófst klukkan 10 þar sem til umræðu er fjármálaáætlun, síðari umræða. Í framhaldinu heldur umræða um breytingu á veiðigjaldi áfram en umræðan er orðin sú næstlengsta á Alþingi á síðari árum.

Um viðveru þingmanna segir í þingskaparlögum: „Skylt er þingmönnum að sækja alla þingfundi nema nauðsyn banni. Forföll skal tilkynna forseta svo fljótt sem unnt er og metur hann nauðsynina.“ 

Þó er ljóst að þetta ákvæði er þverbrotið sennilega á allflestum dögum þingsins nema kannski við upphaf þings og þinglok. Þegar mæting þingmanna er reiknuð út er það sömuleiðis gert út frá mætingu í atkvæðagreiðslur frekar en á þingfundi.