Rýma sex­tán þorp vegna gróðurelda í Grikk­landi

Um tvö hundruð slökkviliðsmenn hafa verið að slást við eldana og hundrað og sjötíu til viðbótar eru á leið á eyjuna frá Grikklandi.

Sterkir vindar gera eldana mjög erfiða viðureignar. Tólf þyrlur og fjórar flugvélar hafa verið á flugi um svæðið að sturta vatni niður á eldana.

Heima- og ferðamenn á hættusvæðum fengu boð í farsíma sína í dag þar sem þeim var skipað að yfirgefa svæðið.

Ioannis Kefalogiannnis, innanríkisráðherra Grikklands, segir að ákvörðunin um að lýsa yfir neyðarástandi hafi verið tekin svo yfirvöld gætu strax gert nauðsynlegar ráðstafanir til að slökkva eldinn.

Hann sagði að öflugir vindar, sem mældust um sex stig á Beaufort skalanum, væru að gera ástandið mjög erfitt viðureignar.

„Ef vindinn lægir eitthvað gætum við farið að ná stjórn á þessu. En það hefur ekkei gerst.“

Þá sagði talsmaður grískra yfirvalda að ástandið væri enn erfitt, þar sem slökkviliðsmenn væru enn að fást við eldinn á mörgum vígstöðvum.

Grísk yfirvöld segja að grunur sé um að íkveikja hafi komið eldunum af stað, og rannsókn sé hafin á tildrögum eldanna. Þótti þeim meðal annars grunsamlegt að kviknað hefði í á þremur stöðum á svipuðum tíma.

Ioannis Kefalogiannnis sagði að ef í ljós kæmi að um íkveikju hafi verið að ræða myndi sá sem að henni stóð sæta harðri refsingu.

Telegraph