Upp­gjör: KA - Breiða­blik 0-1 | Blikar sluppu með skrekkinn í blá­lokin

Blikar hoppuðu upp í annað sæti Bestu deildar karla í fótbolta eftir nauman 1-0 útisigur á botnliði KA fyrir norðan.

Leikurinn fór rólega af stað og héldu leikmenn Breiðabliks boltanum vel innan liðsins og þreifuðu fyrir sér.

Eftir þrettán mínútna leik komust gestirnir í forystu og var þar að verki Aron Bjarnason. Blikar tóku stutta hornspyrnu og Höskuldur fékk boltann aftur til sín eftir fyrirgjöf og óð inn á teiginn og eftir smá klafs kom hann boltanum á Aron sem kláraði vel undir Steinþór í marki KA.

Það gerðist nær ekkert annað markvert það sem eftir lifði hálfleiksins en Blikar héldu boltanum að vild og komst KA í raun hvorki lönd sé strönd og runnu sóknir þeirra oftast út í sandinn um leið og þær byrjuðu.

Blikar héldu áfram vel í boltann í upphafi síðari hálfleiks en KA menn reyndu að sækja hratt þegar færi gafst. Á 61. mínútu fékk Viðar Örn Kjartansson dauðafæri til að jafna leikinn eftir fyrirgjöf frá Guðjóni Erni en Anton Ari varði glæsilega og hélt gestunum í forystu.

Nokkrum mínútum síðar voru KA menn aftur á móti heppnir að lenda ekki tveimur mörkum undir þegar Viktor Karl og Aron Bjarnason komust í raun báðir í frábæra stöðu inn á teig eftir klaufagang í vörninni en nýttu sér það ekki.

Bæði lið fengu nokkur tækifæri til þess að skora það sem lifði leiks og besta tækifæri KA kom í uppbótartíma þegar blikar björguðu á línu eftir skalla frá Rodri.

Niðurstaðan 1-0 sigur Breiðabliks sem tyllir sér  í annað sætið með 13 stig ásamt Vestra en með verri markatölu. KA áfram á botninum með fjögur stig.

Atvik leiksins

Það var stórt atvik þegar Anton Ari varði glæsilega frá Viðari Erni sem var í dauðafæri og gat jafnað fyrir KA sem hefði getað breytt leiknum til muna.

Stjörnur og skúrkar

Hjá Blikum átti Arnór Gauti Ragnarsson flottan leik á miðjunni. Aron Bjarnason var ógnandi í fremstu víglínu og þá átti Kristinn Steindórsson góða innkomu en hann leysti meiddan Höskuld Gunnlaugsson af í hálfleik.

Anton Ari ver svo m.a. þetta dauðafæri frá Viðari sem telur stórt.

Guðjón Ernir Hrafnkelsson var líflegur í vængbakvarðastöðunni hjá KA og getur vel við unað.

Ásgeir Sigurgeirsson vann vel sem fremsti maður og kom sér í fínar stöður.

Þá átti Steinþór Már Auðunsson eina risastóra vörslu til að halda KA í leiknum og var heilt yfir öruggur. Gat lítið gert í marki Blika.

Dómarinn

KA menn eru ekkert sérstaklega ánægðir með frammistöðu Ívars Orra í dag og vildu m.a. fá víti og rautt spjald í sitt hvoru atvikinu. Einnig voru þeir óánægðir með lítinn uppbótartíma þar sem Blikar töfðu leikinn.

Kannski ekki besti leikur Ívars en fyrir hlutlausa líklega bara ágætis frammistaða og ekkert stórt sem hægt er að setja út á.

Stemning og umgjörð

Það heyrðist lítið sem ekkert úr stúkunni og stemningin því ekki mikil en ágætlega mætt.

Umgjörðin flott að vanda og alltaf góðar umræður í Júdó salnum í KA heimilinu þar sem blaðamenn halda til.