Síðasti stjórnarandstöðuflokkur Hong Kong verður leystur upp

Fimm hátt settir einstaklingar innan flokksins sögðu í samtali við miðilinn Reuters að kínverskir embættismenn hefðu hótað stjórnarmönnum Lýðræðisflokksins handtöku eða verra verði flokkurinn ekki leystur upp.

Lýðveldisflokkurinn var stofnaður þremur árum áður en að Bretar létu sjálfstjórnarsvæðið Hong Kong af hendi árið 1997. Síðan þá hefur hann verið helsta mótvægisafl við auknu valdi kínverskra stjórnvalda á þingi Hong Kong. Lo Kinhei formaður segir að 90 prósent flokksmeðlima hafi greitt atkvæði með því að setja á laggirnar þriggja manna nefnd til að undirbúa upplausn flokksins.

„Ég vona að stjórnmálaflokkar Hong Kong muni halda áfram að vinna í þágu fólksins. Við vonuðumst alltaf eftir því að fá að þjóna fólkinu í Hong Kong og gera góða hluti fyrir samfélagið,“ segir hann í samtali við fréttamenn eftir að tilkynnt var um upplausn flokksins.

Atkvæðagreiðsla fer fram þar sem allir flokksmeðlimir eru með atkvæði um endanlega upplausn flokksins. Þrír fjórðu hlutar skráðra meðlima þurfa að greiða atkvæði með upplausn til að hún taki gildi. Því er búist við því að ferlinu ljúki ekki fyrr en á næsta ári. Verði upplausn niðurstaðan sé þriggja áratuga kafla í sögu lýðræðis í Hong Kong lokið og óvíst um framtíðina. Hver einasti sitjandi fulltrúi tilheyrir hópi flokka sem styður aukin ítök kínverskra stjórnvalda í Hong Kong.

Yeung Sum, einn stofnanda flokksins, lýsir stöðunni sem uppi er kominni sem synd. Hann segist í samtali við fréttamenn hafa trú á því að íbúar Hong Kong muni ekki gefa lýðræðið upp á bátinn.

„Stjórnmálamenningin og baráttan fyrir lýðræði mun halda áfram í Hong Kong á friðsælan hátt,“ segir hann.

Að minnsta kosti fimm meðlimir flokksins sitja í fangelsum vegna þátttöku í mótmælum eða annars konar andstöðu við kínversk stjórnvöld.