Nauðgunardómi snúið við: „Gæfi allt til að taka þetta til baka“

Í gögnum málsins kemur fram að í aðdraganda atviksins sem málið varðar, sem átti sér stað í júlí 2019, hafi stúlkan og maðurinn verið að djamma saman í miðbæ Reykjavíkur, ásamt öðrum, en endað í eftirpartýi heima hjá honum.

Manninum var gefið að sök að hafa á heimili sínu, nánar tiltekið í hjónaherbergi hússins, stungið fingri í leggöng stúlkunnar á meðan hún svaf og haldið því áfram eftir að hún vaknaði. Þá hafi hann fært sig ofan áhana, látið hana fróa honum og haft samræði við hana gegn hennar vilja.

Í ákærunni segir að hann hafi notfært sér að hún gæti ekki spornað við verknaðinum vegna áhrifa áfengis og svefndrunga. Þá var hann sagður hafa beitt hana ólögmætri nauðung með því að nýta sér yfirburði sína og traust hennar, vegna náinna fjölskyldutengsla.

Deilt um skilaboð á samfélagsmiðlum

Á meðal gagna málsins voru skjáskot sem sýndu samskipti á samfélagsmiðlinum Snapchat. Samkvæmt stúlkunni og öðrum vitnum sýndu þau samskipti hennar og mannsins, en hann vildi ekki kannast við þau.

Líkt og áður segir sýknaði Héraðsdómur Reykjavíkur manninn, en dómurinn taldi ósannað að þessi skilaboð kæmu frá honum. Landsréttur var á öðru máli og taldi framburð stúlkunnar, sem og móður hennar og systur sem voru viðstaddar þegar hún fékk skilaboðin, trúverðugri en manninn.

Því taldi dómurinn sannað að þau hefðu komið frá honum.

Talaði um misræmi í frásöng stúlkunnar

Héraðsdómur talaði um misræmi í framburði stúlkunnar. Fyrir dómi hefði hún talað um að á meðan nauðguninni stóð hefði maðurinn gripið um munn hennar, en ekkert hefði komið fram um það í framburði hennar hjá lögreglu.

Landsréttur gefur lítið fyrir þetta meinta misræmi í dómi sínum. Í lögregluskýrslunni mun konan hafa sagt að maðurinn hefði „þaggað niður“ í henni, án þess að tala um að hann hafi gripið um munninn á henni. Því var það mat Landsréttar að í mesta lagi væri um að ræða stigsmun í frásögn hennar.

Þetta þótti því ekki draga úr framburði hennar, sem væri annars afar trúverðugur. Þá væru atriði sem drægju úr framburði mannsins. Því var framburður stúlkunnar lagður til grundvallar, og maðurinn sakfelldur.

Málið búið að dragast á langinn

Við ákvörðun refsingar var litið til þess að verulegur dráttur hefði orðið á málinu. Líkt og áður segir hefðu atvik málsins átt sér stað sumarið 2019. Ákæra hefði ekki verið gefin út fyrr en um fjórum árum eftir að málið kom upp, og þessi dómur kveðinn upp á sjötta ári frá því að atvik málsins áttu sér stað. Það væri ekki hægt að kenna manninum um það.

Þar af leiðandi var hluti refsingar mannsins skilorðsbundinn. Hann var dæmdur í tveggja ára fangelsi, þar sem 21 mánuðir eru skilorðsbundnir til þriggja ára. Einkaréttarkröfu stúlkunnar var vísað aftur í hérað, en manninum er einnig gert að greiða henni 3,4 milljónir króna og áfrýjunarkostnað málsins, sem var 2,6 milljónir.