Fékk á­fall þegar rang­lega var full­yrt að stunguárásin hafi gerst á heimili hennar

„Ég sé það bara í fréttunum á nýársdag. Ég fékk algjört áfall, þá er sýnt húsið, heimreiðin heim til mín, húsið mitt, hesthúsið, hús strákanna minna sem er þarna fyrir neðan og talað um að það hafi orðið hnífsstunga heima hjá mér,“ segir Halldóra Bjarnadóttir, eigandi Tinda og íbúi í umræddu húsi. 

Hún ræddi málið í Bítinu á Bylgjunni en engin gististarfsemi hefur verið rekin í húsinu frá árinu 2019. Árásin hafi átt sér stað í húsi um tvö hundruð metrum ofar.

Fréttastofa RÚV leiðrétti þetta í kvöldfréttum sínum í gær og baðst velvirðingar á mistökunum. Var vísað til þess að fullyrðingar um staðsetningu árásarinnar hafi byggt á upplýsingum sem lögregla hafði á þeim tíma.

Halldóra gagnrýnir harðlega að þetta hafi einungis fengist leiðrétt eftir ítrekaðar beiðnir og símtöl á fréttastofu RÚV. 

Yndislegt fólk búi í húsinu

Nokkrir hlutu áverka í átökunum á nýársnótt en einn þó sýnu verst og var sá sagður alvarlega slasaður eftir atlöguna. Sá hlaut stungu í brjósthol en hann hefur verið fluttur af gjörgæslu á almenna deild Landspítalans. Tveir til viðbótar sem særðust í árásinni hafa verið útskrifaðir af spítala. Einn hefur verið úrskurðaður í gæsluvarðhald í tengslum við málið.

„Í fyrsta lagi þá er þetta bara mjög sorglegur atburður. Þetta er yndislegt fólk sem býr þarna, það eru held ég sirka átján Pólverjar sem búa þarna við hliðina á mér og ég verð aldrei vör við þetta fólk. Það er bara yndislegt, sofnuðu eldsnemma, og voru farin sex í vinnuna. Ég er búin að búa þarna í 25 ár og ég hef einu sinni heyrt þau halda partí,“ segir Halldóra. Það hafi verið óþægilegt að heyra lætin í næsta húsi á nýársnótt og sjá svo fjölda lögreglu- og sjúkrabifreiða fyrir utan.

Halldóra segir engan vafa leika á því að RÚV hafi valdið henni fjárhagslegu tjóni með því að tengja gistiheimilið við hnífaárásina en hún var með húsnæðið í útleigu á Airbnb fram til ársins 2019.

„Ég er alveg klár á því. Ég er ekkert að fara af stað með gistiheimili á næstunni.“

Vont fyrir alla

Sveinn Jónsson, framkvæmdastjóri Matfugls, staðfestir að átökin og stunguárásin hafi farið fram í íbúðarhúsnæði sem fyrirtækið er með fyrir starfsfólk sitt. Mannlíf greindi áður frá staðsetningunni en Sveinn segir í samtali við Vísi að stungumálið sé vont fyrir alla og tekur undir með Halldóru að yfirleitt hafi allt verið með kyrrum kjörum í starfsmannahúsnæðinu.

„Það hefur aldrei verið neitt vesen þarna og það hefur bara eitthvað komið upp sem við vitum ekki hvað er.“ Fram hefur komið að lögreglan telji að stunguárásin hafi átt sér stað eftir að átök brutust út í nýársfögnuði þar sem bæði íbúar og gestir voru viðstaddir.