Sak­borningur í Elko-málinu líka grunaður um heimilis­of­beldi

Elko-málið varðar þjófnað í tveimur verslunum raftækjarisans Elko, í Lindum og Skeifunni, sem voru framin að kvöldi 22. september og aðfaranótt 23. sama mánaðar. Maðurinn er grunaður um að fremja verknaðinn ásamt fleirum. 

Greint var frá því að virði þýfisins hlaupi á tugmilljónum króna, en þeir höfðu síma, dýr tæki og reiðufé með sér á brott.

Í fyrstu voru sjö Rúmenar, bæði karlar og konur, handteknir vegna málsins. Þar af voru þrír handteknir eftir að hafa innritað sig í flug á Keflavíkurflugvelli. Aðrir tveir voru handteknir með þýfi á leið í Norrænu. 

Í kjölfar þess að málið kom upp lýsti lögreglan eftir tveimur mönnum. Skömmu eftir að tilkynning lögreglu þess efnis birtist sagðist hún hafa fengið upplýsingar um hverjir þeir væru.

Tók eftir því daginn eftir að einhver hefði brotist inn

Í gæsluvarðhaldsúrskurði Héraðsdóms Reykjavíkur frá 4. október síðastliðnum er haft eftir vitni sem var að vinna við framkvæmdir í húsnæði Elko í Lindum að þegar hann hafi farið úr vinnu klukkan fjögur síðdegis 22. september hafi allt verið í lagi.

Þegar hann kom daginn eftir hafi verið búið að brjóta timburhlera á glugga húsnæðisins. Hann sagði að búið væri að opna peningaskáp sem var inni í versluninni.

Þá væri lögreglan með nafnlausa ábendingu um að einn maður, sá sem er grunaður um fjöldann allan af afbrotum, tengdist málinu. Hann hafi verið handtekinn samdægurs, 23. september og úrskurðaður í gæsluvarðhald.

Grunaður um heimilisofbeldi

Auk Elko-málsins væri hann undir rökstuddum grun í sextán öðrum málum.

Þá liggur fyrir ákvörðun Útlendingastofnunnar um brottvísun og þriggja ára endurkomubann mannsins til Íslands. Honum var birt sú ákvörðun nokkrum dögum eftir handtökuna.

Maðurinn er grunaður um heimilisofbeldi. Hann er talinn hafa ráðist með ofbeldi gegn dóttur sinni og barnsmóður. Meint brot hans telst varða 218. grein b. almennra hegningarlaga. Það er að segja að hann er grunaður um að hafa á endurtekið eða á alvarlegan hátt ógnað lífi, heilsu og velferð barnsins og barnsmóðurinnar.

Margra milljóna þýfi í öðrum málum

Maðurinn er grunaður um fjölda þjófnaðarbrota. Að Elko-málinu undanskildu er umfangsmesta málið þjófnaður á ýmsum munum í Nova á Selfossi. Þar er maðurinn grunaður um að stela níu farsímum og hátalara, hvers virði var samanlagt 1,739 milljónir króna.

Hann er einnig grunaður um sjö önnur þjófnaðarbrot í verslunum Elko, Krónunnar, Lyfju, Bónus og ÁTVR sem voru framin frá maí og til ágústmánuðar á þessu ári. Samanlagt verðmæti þýfis þeirra mála mun vera um það bil 340 þúsund krónur.

Einnig er maðurinn grunaður um fjölda umferðarlagabrota sem varða til að mynda of hraðan akstur, akstur undir áhrifum og akstur án ökuréttinda.

Þar að auki má minnast á að í september hlaut maðurinn fimm mánaða fangelsisdóm, skilorðsbundinn til tveggja ára fyrir ýmis brot, þar á meðal fjölda þjófnaðarbrota sem samanlagt vörðuðu þýfi sem hleypur á tæpri einni og hálfri milljón króna.