Máttu rukka ís­lenska konu um 1,2 milljón fyrir dvöl á spítalanum

Úrskurðurinn var kveðinn upp í heilbrigðisráðuneytinu þann 17. október en konan kærði ákvörðun Landspítalans um að hafna niðurfellingu gjalda í ágúst. Landspítalinn hafnaði kröfu konunnar í júlí.

Fram kemur í úrskurðinum að konan kom til Íslands seinni hluta maí á þessu ári og leitaði til Landspítalans þann 27. sama mánaðar vegna veikinda. Hún var í kjölfarið lögð inn á gjörgæslu og dvaldi á spítalanum í tvo daga. Eftir útskrift leitaði hún svo á göngudeild spítalans fjórum sinnum án þess að leggjast inn.

Þar sem konan var ósjúkratryggð á umræddu tímabili var henni gerður reikningur upp á 1.246.283 krónur vegna legu sinnar á Landspítala auk þess sem henni var gerður reikningur upp á 57.604 krónur vegna komu sinnar í fjögur skipti á göngudeild eftir að legu lauk.

Hafði nýlega flutt lögheimili sitt

Í úrskurðinum kemur fram að konan hafi þegar hún fékk reikning óskað eftir niðurfellingu en Landspítalinn bent á í ákvörðun sinni að þeim beri, á grundvelli reglugerðar, að innheimta kostnað vegna legu og komugjöld samkvæmt gjaldskrá vegna ósjúkratryggðra sjúklinga sem þangað koma og ekki eru sjúkratryggðir. Þannig sé hægt að tryggja jafnræði.

Konan byggir kæru sína á því að aðstæður hennar séu bágbornar. Hún glími enn við veikindi auk þess sem þau hafi kostað hana mikla fjármuni, bæði vegna þjónustu á Landspítala og utan hans. Þá byggði hún kæru sína á því að hún væri íslenskur ríkisborgari og hafi verið með lögheimili á Íslandi þar til fyrir skömmu áður.

Af þeim sökum óski hún eftir því að innheimta spítalans vegna legu hennar á Landspítala í umrætt skipti frá 27. til 29. maí yrði líkt og hún hefði enn verið með lögheimili á Íslandi eða hún lækkuð verulega.

Reikningurinn eigi sér stoð í reglugerð og lögum

Landspítalinn bendir í ákvörðun sinni á að þegar einstaklingur flytur búsetu sína missi hann rétt til sjúkratrygginga. Tölvukerfi þeirra sé tengt við grunn Sjúkratrygginga Íslands og að það séu lög og reglur sem gildi um ósjúkratryggða á Íslandi.

Í niðurstöðu ráðuneytisins segir að ekki sé fjallað um það hvort konan hafi verið sjúkratryggð eða ekki, það sé ákvörðun SÍ. Það sé fjallað um það í lögum hverjir séu sjúkratryggðir og hverjir ekki og um gjaldtöku sömuleiðis. Þá bendir Landspítalinn á að ekki sé milliríkjasamningur við Bandaríkin um greiðslu sjúkratrygginga.

Þá segir að reikningar Landspítalans eigi sér stoð í bæði reglugerð og lögum.

„Þar sem ekki er fyrir að fara heimild í lögum eða reglugerð til að fella niður umrædda reikninga er ákvörðun Landspítala um að hafna umsókn um niðurfellingu sjúklingagjalda staðfest,“ segir að lokum.