Elstu starfandi fisk­búð höfuð­borgar­svæðisins skellt í lás

Síðustu áratugina hafa feðgarnir Ágúst Tómasson og Tómas Ágústsson rekið fiskbúðina, en Tómas tók við rekstrinum af föður sínum fyrir nokkrum árum.

Ágúst segir í samtali við fréttastofu að persónulegar ástæður hafi legið að baki þeirri ákvörðun að loka. „Fiskverð hefur náttúrulega hækkað mikið og þá dregur úr neyslunni. En það hefur allt verið að hækka. Það hefur líka verið erfitt að fá yngra fólk til starfa.“

Hann segir að í júlí hafi fiskbúðinni verið lokað, en í færslu á Facebook í ágúst kom fram að nauðsynlegt væri að hafa hana lokaða um óákveðinn tíma. Nú liggi hins vegar fyrir að verslunin mun ekki opna á ný.

Elsta starfandi fiskbúðin

Ágúst segir að Fiskbúðin Trönuhrauni hafi fyrst opnað 15. desember 1959 og hafi því verið elsta starfandi fiskbúðin á höfuðborgarsvæðinu.

Ágúst tók við rekstri fiskbúðarinnar á níunda áratugnum og segir hann að margt hafi breyst síðan. 

„Það hefur eiginlega allt breyst síðan það var. Fiskneyslan og fiskurinn sem hefur verið í boði. Ég tek við árið 1986 og þá voru margir að koma tvisvar á dag, þrjá eða fjóra daga í viku. Þá var heldur ekki fiskur í hádeginu í skólum og vinnustöðum og fyrir vikið er nú ekki borðað jafn mikið af fiski á heimilum. En það er að sjálfsögðu erfitt að sjá á eftir alvöru fiskbúð.“

Fiskbúðin á Sundlaugavegi í Reykjavík var fyrst opnuð árið 1947 en henni var lokað síðasta vor. Hún mun þó opna á ný á næstu dögum með nýjum eigendum. Það má því segja að fiskbúðin í Trönuhrauni hafi verið elsta starfandi fiskbúðin á höfuðborgarsvæðinu þegar henni var lokað.

Hrikalega mikil niðursveifla

Kristján Berg, sem einnig gengur undir nafninu Fiskikóngurinn, vakti athygli á tíðindunum úr Hafnarfirði í færslu á Facebook í gær. 

„30 niður í 6. Fækkar um eina fiskbúð til viðbótar. Ég fékk þær leiðinlegu fréttir í gær að fiskverslunin í Trönuhrauni í Hafnarfirði hefði ákveðið að hætta rekstri. Ástæðuna veit ég ekki, en þetta eru sorglegar fréttir,“ segir Kristján og vísar þar í að þegar hann hafi hafið störf sem fisksali, átján ára gamall, hafi verið þrjátíu fiskbúðir starfandi í Reykjavík. Nú séu þær sex.

Hann segir að Fiskbúðin í Trönuhrauni hafi haft orð á sér að vera alltaf með góðan fisk og halda á lofti íslenskum hefðum og íslensku hráefni.

„Boðið uppá íslenskt hráefni, eins og skötu, siginn fisk, sólþurrkaður saltfiskur, svartfugli og svartfuglseggjum svo dæmi séu nefnd.

Það sem ég hef áhyggjur af og hef ég haft þessar áhyggjur lengi, er að þessar fiskverslanir eru hratt að týna tölunni. Þeim fækkar og fækkar.

Það sem gerist líka er að uppruni okkar, sá matur og matarmenning okkar sem við borðuðum í gamla daga er að hverfa. Nægir að nefna hrikalega mikla niðursveiflu í sölu á ferskum þorsk hrognum,“ segir Kristján.

Hann hvetur landsmenn til að borða meiri fisk og heimsækja fiskbúðirnar. „Án viðskiptavina, þá loka fleiri verslanir innan skamms. Þannig virkar bara þessi viðskipti. Sorgarkveðja og sendi ég landsmönnum mínar dýpstu samúðarkveðjur,“ segir Kristján.