Innlent

Boða hertar að­gerðir gegn vopna­burði

Berghildur Erla Bernharðsdóttir skrifar
Guðrún Hafsteinsdóttir hefur skipað aðgerðarhóp til að sporna við auknum vopnaburði ungmenna og alvarlegum ofbeldisbrotum. Sigríður Björk Guðjónsdóttir ríkislögreglustjóri segir þegar byrjað að undirbúa aðgerðir.
Guðrún Hafsteinsdóttir hefur skipað aðgerðarhóp til að sporna við auknum vopnaburði ungmenna og alvarlegum ofbeldisbrotum. Sigríður Björk Guðjónsdóttir ríkislögreglustjóri segir þegar byrjað að undirbúa aðgerðir. Vísir

Ríkisstjórnin boðar hertar aðgerðir gegn vopnaburði ungmenna og hefur skipað starfshóp sem á að skila tillögum að aðgerðum á næstu dögum. Dómsmálaráðherra segir brýnt að bregðast við og svara ákalli þjóðarinnar. Lögregla hefur aldrei lagt hald á eins mikið magn hnífa og annarra vopna og síðustu ár.

Klippa: Kalla eftir nýrri löggjöf

Sífellt fleiri úr röðum almennings, barna og ungmenna, stjórnmála, kirkjunnar og skóla hafa stigið fram á ýmsum vettvangi síðustu daga og kallað eftir samfélagsvakningu gegn hnífa- og vopnaburði ungmenna. Ákallið kemur í kjölfar þess að sautján ára stúlka lést eftir hnífaárás sextán ára pilts á Menningarnótt. Nú þurfi allt samfélagið að bregðast við auknum fjölda alvarlegra ofbeldisbrota.

Hluti af hnífum og vopnum sem lögregla hefur lagt hald á síðustu ár.Vísir/Sigurjón

Vandinn kemur glögglega í ljós í fjölda haldlagðra hnífa og vopna í vörslu lögreglu þá bæði frá fullorðnum og ungmennum. Þar hefur orðið gríðarleg aukning síðustu fjögur ár. Mikið er af hættulegum og ólöglegum vopnum sem lögregla leggur hald þegar grunur er um slíkt eða frá vettvangi.

Tekur undir ákall þjóðarinnar

„Ég vil byrja á því að votta fjölskyldu Bryndísar Klöru sem lést af sárum sínum um helgina mína innilegustu samúð. Ég held að þjóðin öll sé reiðubúin núna að stöðva þessa óheillaþróun sem að við höfum séð á síðustu árum,“ segir Guðrún Hafsteinsdóttir dómsmálaráðherra.

Guðrún Hafsteinsdóttir mun áfram setja breytingar á útlendingalögum í forgang. Nokkuð sem samráðherra hennar í ríkisstjórn telur að þurfi ekki að gera.Vísir/Vilhelm

Ríkisstjórnin tók málið fyrir á fundi sínum í morgun og Guðrún boðar hertar aðgerðir.

„Nú erum við að setja af stað aðgerðarhóp sem mun hittast á morgun. Hann á að forgangsraða tillögum okkar og við væntum niðurstöðu þaðan næstu daga þannig að við getum stigið mjög fast inn í þessa þróun,“ segir Guðrún. 

Hún tekur fram að í þessari vinnu verði líka horft til aðgerða í málaflokknum sem voru kynntar í sumar.

Erfitt að bregðast fyrr við

Sigríður Björk Guðjónsdóttir ríkislögreglustjóri mætti á fund ríkisstjórnarinnar í morgun og kynnti aðgerðir lögreglu. Hún telur að erfitt hafi verið að bregðast fyrr við aukinni hörku.

„Nei í raun og veru ekki. Við höfum verið að stilla saman strengi. Við höfum verið að búa til aðgerðaráætlanir. Við erum búin að ýta mjög mörgu úr vör. Það sem hins vegar hefur gerst vegna alvarleika þeirra brota sem hafa komið upp að undanförnu er að þá þurfum við að setja meiri kraft í þessi verkefni. Það verður þá gert með samstilltu átaki með auknu fjármagni og forgangsröðun verkefna,“ segir Sigríður.

Börn og uppeldi Ofbeldi gegn börnum Lögreglan Ríkisstjórn Bjarna Benediktssonar Alþingi Skóla- og menntamál Trúmál Stunguárás við Skúlagötu Vopnaburður barna og ungmenna Ofbeldi barna

Tengdar fréttir

Mega ekki leita að vopnum í töskum og fatnaði barnanna

Vopnaburður grunnskólabarna og unglinga hefur aukist á síðustu árum segir formaður Skólastjórafélags Íslands. Enn uggvænlegri þróun hafi orðið nýlega í þá átt að ungmenni eru farin að beita vopnunum. Samfélagið sé komið á alvarlegan stað og nú þurfi að spyrna við fótum.

Leggja aukinn þunga í að rann­saka á­­setning hins grunaða

Lögregla leggur nú áherslu á að kanna ásetning drengsins sem grunaður er um að hafa stungið þrjú ungmenni á menningarnótt, með þeim afleiðingum að sautján ára stúlka lést. Málið hefur hreyft við þjóðinni og á samfélagsmiðlum biðlar fólk til ungmenna að hætta hnífaburði.

Mest lesið


Fleiri fréttir

Sjá meira


×

Mest lesið