Enginn öruggur staður eftir á Gasa

„Frá upphafi stríðsins á Gasa hefur líf hvers og eins verið gjörbreytt. Þau hafa búið við stanslausar sprengjuárásir, nótt og dag, sem hætta aldrei,“ segir Nebal og að enginn sé ósnortinn af hörmungunum.

„Það þýðir að hver og einn hefur misst fjölskyldumeðlim eða einhvern sem þau elska. Eða hafa særst eða eru orðin fötluð. Eða að heimili þeirra hefur verið eyðilögð. Eða að þau sjálf eða fjölskyldumeðlimir þeirra hafa þurft að leggja á flótta,“ segir Nebal og í tilfelli margra hafa þau þurft að leggja á flótta oftar en einu sinni.

„Það er enginn öruggur staður hérna og í hvert sinn sem ísraelski herinn fyrirskipar brottflutning þá neyðist fólk til að yfirgefa bæinn sinn eða þorpið,“ segir Nebal. Hún segir fólk hvergi öruggt og jafnvel á leiðinni annað hafi það lent í sprengjuárásum.

„Það er enginn öruggur staður á Gasa. Það skiptir ekki máli hvað það er, það er allt skotmark. Skólar, heimili, neyðarskýli, spítalar, kirkjur og moskur. Gasa eru rústir einar og hefur verið eyðilögð,“ segir Nebal.

Vantar hjálpargögn

Eitt af mikilvægustu verkefnum palestínska hálfmánans á Gasa er dreifing neyðaraðstoðar. Nebal segir að allt of lítið fái að fara inn á svæðið af hjálpargögnum. Ísraelar stjórni því hvað fari inn og að það sem fari nú inn mæti ekki nema um tíu prósent af þeirri þörf sem er á svæðinu. Hún segir að um 90 prósent þjóðarinnar sé á vergangi og því þurfi nærri öll þjóðin á neyðaraðstoð að halda.

„Við þurfum nóg af vatni, mat og hjálpargögnum fyrir alla þjóðina,“ segir Nebal og að mjög áríðandi sé að að opna landamærin svo að hægt sé að senda hjálpargögn stanslaust inn. Það þurfi teppi, tjöld, mat, vatn og ýmis önnur hjálpargögn.

„Það er að kólna og við þurfum miklu fleiri teppi og hlý föt fyrir börnin á Gaza. Stærstu áskoranir fyrir fólk á Gasa núna er það hvert það eigi að fara. Það getur ekkert farið,“ segir Nebal og nefnir sem dæmi að nú sé verið að vísa þúsundum manna frá Khan Younis til Rafah en að þau viti ekki hvernig þau eigi að komast á milli.

Hefur misst átta samstarfsmenn

Nebal segir að fá því í upphafi október hafi hún misst átta samstarfsmenn sína sem allir unnu við það að keyra sjúkrabíl á Gasa.

„Þeir voru allir í vinnu og voru að reyna að bjarga mannslífum,“ segir hún og að í það minnsta 29 hafi særst í átökum. Hún segir fjórtán sjúkrabíla Rauða hálfmánans hafa skemmst og að ekki sé hægt að keyra þá lengur. Auk þess séu 19 aðrir sjúkrabílar skemmdir en enn ökuhæfir.

Rauði krossinn heldur áfram að vinna á vettvangi

Hrafnhildur Sverrisdóttir, verkefnastjóri hjá alþjóðateymi Rauða krossins á Íslandi, segir starfsfólk palestínska Rauða hálfmánans vinna ótrúlegt starf á Gasa.

„Rauði krossinn er á vettvangi, bæði Alþjóðaráð Rauða krossins og palestínski Rauði hálfmáninn. Þau eru að vinna sitt starf af heilindum og munu halda því áfram,“ segir Hrafnhildur.

Hún segir vinnu palestínska Rauða hálfmánans á vettvangi gríðarlega mikilvæga. Félagið sjái að miklu leyti um dreifingu hjálpargagna en of lítið sé að berast og miklar tafir séu á flutningum

„Landamærastöðin við Rafah er til dæmis ekki hönnuð fyrir vöruflutninga,“ segir Hrafnhildur og að starfsfólkið mæti miklum hindrunum í vinnu sinni, sem og önnur hjálparsamtök, meðal annars vegna hættuástands og tafa.

„Fyrst of fremst þurfa átökin að taka enda,“ segir Hrafnhildur og að það sé nauðsynlegt að koma á vopnahléi svo hægt sé að koma nauðsynlegum hjálpargögnum inn á Gasa-svæðið.

„Það þarf meira magn af vistum en hleypt er inn núna. Starfsfólk og sjálfboðaliðar palestínska Rauða hálfmánans eru að vinna ótrúlegt starf og við afar krefjandi aðstæður. Það gætu fáir sinnt þessu starfi jafn vel,“ segir Hrafnhildur.

Hún segir að innan félagsins starfi gríðarlegur fjöldi starfsmanna og sjálfboðaliða frá svæðinu. Þau tali því tungumálið og þekki vel til aðstæðna.

Heimamenn leiði neyðaraðstoð

„Það er stefna innan mannúðargeirans að heimamenn leiði neyðaraðstoð og palestínski Rauði hálfmáninn hefur getu til að gera það,“ segir Hrafnhildur og að í samvinnu við egypska Rauða hálfmánann hafi þau unnið ótrúlegt þrekvirki síðustu mánuði.

„Þau hafa haldið úti sjúkraþjónustu á Norður-Gasa þrátt fyrir að þeim væru ekki að berast nægar vistir. Á sama tíma og aðrir lokuðu þjónustu sinni þá hélt palestínski Rauði hálfmáninn áfram að þjónusta fólk.“

Hún segir að hægt sé að leggja þeim bæði lið með því að styrkja Rauða krossinn á Íslandi eða með því að styrkja palestínska Rauða hálfmánann beint í gegnum heimasíðu félagsins.

„Það er ekki framtíðarlausn en það sem fólk getur gert hvað varðar þetta er að leggja fram framlag í safnanir,“ segir Hrafnhildur. Hún segir Rauða krossinn á Íslandi bæði hafa stutt við Alþjóðaráð Rauða krossins en líka við palestínska Rauða hálfmánann og muni halda því áfram.