Hag­kaup aftur sektað vegna tax-free aug­lýsinga sinna

Á vef Neytendastofu segir að Hagkaup hafi auglýsingu á Facebook síðu sinni og á mbl.is þar sem afsláttarprósentan hafi ekki verið tekin fram. Hafi Hagkaup því ekki veit neytendum þær upplýsingar sem skylt sé að veita lögum samkvæmt.

Þá taldi Neytendastofa að í auglýsingu sem birtist m.a. á samfélagsmiðlum Hagkaups hafi upplýsingarnar ekki verið birtar með nægilega skýrum hætti. Afsláttarprósentan var vinstra megin á myndinni í agnarsmáu letri og á hlið, þrátt fyrir að annar texti í auglýsingunni hafi verið töluvert stærri og skýrari.

Í ákvörðuninni er um það fjallað að neytendur eiga ekki að þurfa að leita að upplýsingum um afsláttarprósentu eða að stækka auglýsinguna til að sjá prósentuna. Hagkaup hafi þ.a.l. leynt neytendur upplýsingum sem skipta þá almennt máli til þess að hafa áhrif á ákvörðun þeirra um að eiga viðskipti.

Sektaði stofnunin Hagkaup um 850.000 kr., m.a. út af fyrri sektarákvörðunum fyrir sambærileg brot,“ segir á vef Neytendastofu.

Svaf á verðinum

Í svörum frá Hagkaup kom fram að félagið hafi sofið á verðinum og þætti það leitt. 

„Félagið hafi gert breytingar í markaðsstarfi og gengið til liðs við auglýsingastofu til að taka að sér hluta af þeirri vinnu sem hafi áður verið gerð innanhúss. Það sé ljóst að félagið hafi ekki fylgt þeirri vinnu nógu vel eftir. Félagið hafi verið með þetta í lagi síðustu ár og það sé leitt að félagið skildi hafa misst taktinn. Félagið taki þessu alvarlega og tjáði stofnuninni að þetta yrði í lagi héðan í frá,“ segir í úrskurðinum.

Þar segir í Hagkaup hafi áður verið sektað vegna sambærilegra auglýsinga.

Agnarsmátt letur og á hlið

Málið nú snýr að auglýsingu þar sem mátti finna texta þar sem vísað væri til „RISA Taxfree“ með mjög afgerandi og áberandi hætti. Þar fyrir neðan hafi svo verið tekið fram, með áberandi letri, „ Tax-free* af snyrtivörum, leikföngum, raftækjum, skóm, heimilisvörum og fatnaði.“

Stjörnumerkinu hafi síðan fylgt eftir með tilvísun á vinstri hlið myndarinnar með agnarsmáu letri þar sem textinn var ritaður á hlið þar sem fram kom að „Tax-free jafngildi 19,36% afslætti“.

„Eins og myndin birtist neytendum á Facebook síðu félagsins þyrftu neytendur almennt að stækka myndina til að sjá prósentuhlutfall verðlækkunarinnar. Sér stofnunin ekki réttmæta ástæðu fyrir því að félagið hafi ekki getað birt prósentuhlutfall verðlækkunarinnar með öðrum texta í auglýsingunni með jafn eða álíka skýrum hætti og annað efni í auglýsingunni. Umrædd framsetning gefur hins vegar til kynna að félagið hafi vísvitandi verið að fela prósentuhlutfall verðlækkunarinnar frá neytendum, enda einu upplýsingarnar í auglýsingunni sem voru birtar með þessum hætti,“ segir í niðurstöðukafla ákvörðunarinnar.