Segir óábyrgt að leysa orkuskiptin með því að flytja framleiðslu annað

Kristján Már Unnarsson skrifar 25. febrúar 2023 22:20

Hörður Arnarson er forstjóri Landsvirkjunar. Egill Aðalsteinsson

Ekki verður sérstaklega virkjað vegna nýrrar stóriðju, að mati forstjóra Landsvirkjunar, sem segir orku nýrra virkjana fremur fara til fjölbreytts hóps smærri fyrirtækja sem og til orkuskipta.

Í fréttum Stöðvar 2 var rifjað upp að í hartnær sextíu ára sögu Landsvirkjunar hafi uppbygging stóriðju jafnan fylgt nýjum stórvirkjunum. Þannig reis álverið í Straumsvík samhliða Búrfellsvirkjun, járnblendið á Grundartanga fylgdi Sigöldu, álver Alcoa Kárahnjúkavirkjun og síðast á Þeistareykjum var virkjað vegna kísilvers á Bakka. Áður hafði Áburðarverksmiðjan fylgt Írafossvirkjun.

Kísilver PCC á Bakka við Húsavík reis samhliða jarðgufuvirkjun á Þeistareykjum.Vísir

Þessu tímabili segir forstjóri Landsvirkjunar lokið.

„Þannig að við erum ekki að sjá virkjanir tengdar einstökum viðskiptavinum. Enda er fjárhagur Landsvirkjunar orðinn þannig að það þarf ekki að gera það. Við getum í raun og veru byggt virkjanir út á efnahagsreikninginn okkar óháð því hvort það er viðskiptavinur eða ekki,“ segir Hörður Arnarson.

Nýjar virkjanir muni mæta fjölbreyttari hópi smærri kaupenda.

„Ja, svona umhverfisvænni iðnaði. Við erum að sjá matvælavinnslu, við erum að sjá hátækniiðnað, við erum að sjá ýmsan svona grænan áhugaverðan iðnað. Svo eru náttúrlega orkuskiptin,“ segir Hörður og nefnir sem dæmi framleiðslu rafeldsneytis.

Frá Alcoa Fjarðaáli á Reyðafirði. Álverið reis samhliða Kárahnjúkavirkjun.Arnar Halldórsson

Hann segir Landsvirkjun þó áfram vilja styðja við stóriðjuna, svo sem við minniháttar stækkanir.

„Að þeir haldi áfram að þróast. Að bæta sína framleiðslu, að auka sína nýtni, meiri háframleiddar vörur.

Og við viljum halda áfram að styðja þau fyrirtæki frekar. Enda eru þau eiginlega lykillinn að þessari góðu afkomu Landsvirkjunar. Það eru þessi traustu, stóru, alþjóðlegu fyrirtæki.“

Þau sjónarmið heyrast að í stað þess að virkja meira vegna orkuskipta verði orkusölu hætt til stóriðju. Forstjóri Landsvirkunar telur skynsamlegra að halda stóriðjunni.

„Fyrir utan það að samningar kveða á um það. Og við teljum að það sé í raun og veru óábyrg leið að í raun og veru að flytja framleiðslu annað og leysa orkuskiptin þannig.

Þannig að við teljum að það sé rétta leiðin að auka orkuvinnslu á svipaðan hátt og við höfum gert áður. Og við teljum að það sé hægt að gera það í góðri sátt við bæði náttúruna og samfélagið,“ segir Hörður Arnarson, forstjóri Landsvirkjunar.

Hér má sjá frétt Stöðvar 2:

Landsvirkjun Áliðnaður Orkumál Orkuskipti Loftslagsmál Umhverfismál Vatnsaflsvirkjanir Jarðhiti

Tengdar fréttir

Methagnaður Landsvirkjunar fyrst og fremst sóttur til stóriðjunnar

Landsvirkjun á núna Kárahnjúkavirkjun skuldlausa sem og allar virkjanir byggðar fyrir hennar tíma. Forstjórinn segir methagnað fyrirtækisins fyrst og fremst sóttan til stóriðjunnar en ekki til almennings.

21. febrúar 2023 22:30

Tvöfalda þarf orkuframleiðsluna vegna orkuskiptanna

Tvöfalda þarf orkuframleiðslu í landinu á næstu átján árum til að ná fram markmiðum um orkuskipti miðað við núverandi orkunýtingu Íslendinga. Umhverfis- orku- og loftslagsráðherra segir að flókið geti reynst að ná fram nauðsynlegri pólitískri samstöðu um þetta en telur alla sammála um markmiðin.

18. október 2022 19:20

„Þetta kallar á allavegana eina 100 megawatta virkjun á hverju ári“

Þörf er á aukinni orkuframleiðslu til að anna orkuskiptum á komandi áratugum. Formaður starfshóps sem vann skýrslu um orkumál segir að tvöföldun á raforkuframleiðslu Íslands kalli á eina 100 megawatta virkjun á ári fram til ársins 2040.

8. mars 2022 22:32

Telur ummæli um virkjanaþörf óábyrg

Þingmaður Pírata segir ummæli formanns starfshóps sem vann skýrslu um orkumál óábyrg en hann sagði að ef við ætlum að tvöfalda raforkuframleiðslu Íslands þurfi að reisa eina 100 megawatta virkjun á ári fram til ársins 2040. Þingmaðurinn segir vel hægt að ná markmiðum um orkuskipti án virkjana.

9. mars 2022 12:43

Mikilvægt að virkja til þess að ná fullum orkuskiptum

Forsætisráðherra telur mikilvægt að virkja til þess að ná fullum orkuskiptum ásamt því að forgangsraða þeirri orku sem við framleiðum í orkuskipti innanlands. Aðstoðarforstjóri Landsvirkjunar segir næstu skref í höndum stjórnmálamanna.

9. mars 2022 20:01

Mest lesið

Fleiri fréttir