Hvalárvirkjun aftur á dagskrá og tvö ár gætu verið í framkvæmdir

Fjallað var um málið í fréttum Stöðvar 2 en af þremur nýjum vatnsaflsvirkjunum, sem fengu grænt ljós frá Alþingi í nýsamþykktri rammaáætlun, eru tvær á Vestfjörðum, Austurgilsvirkjun í Skaldfannardal í Ísafjarðardjúpi og Hvalárvirkjun í Ófeigsfirði á Ströndum.

Vesturverk stendur að Hvalárvirkjun en fyrirtækið er að stærstum hluta í eigu HS Orku.

„Það er verkefni sem er búið að fara í gegnum mat á umhverfisáhrifum og búið að samþykkja í rammaáætlun og í raun og veru sú vatnsaflsvirkjun í rammaáætlun sem gefur mestu miðlun,“ segir Tómas Már Sigurðsson, forstjóri HS Orku.

Deilur um Hvalárvirkjun voru áberandi sumarið 2019 þegar Vesturverk hóf undirbúningsframkvæmdir með lagfæringu vegslóðans um Ingólfsfjörð.

„Við erum ekkert búnir að vera með neinar framkvæmdir síðustu þrjú ár. Við höfum bara aðallega verið að sinna rannsóknum til að vera undirbúin.“

„Það eru fleiri sem þurfa að koma að en bara við. Það þarf náttúrlega að leggja háspennulínu og strengi og annað þess háttar. Og þetta er allt háð leyfum. Menn eru mislangt komnir í leyfisveitingaferlinu. Við erum komin lengst.“

Tómas bendir á að staðan í orkumálum þjóðarinnar sé núna önnur.

„Við sáum klárlega í vetur að það er orkuskortur í landinu. Það er mikil eftirspurn eftir raforku í orkuskipti og slík verkefni. Til lengri tíma tel ég nokkuð líklegt að við munum einbeita okkur að Hvalárvirkjun í framtíðinni.“

Ekkert gerist þó fyrr en Landsnet hefur fengið tilskilin leyfi fyrir háspennulínum svo unnt sé að tengja Hvalárvirkjun inn á raforkukerfið. En hvenær telur forstjóri HS Orku að framkvæmdir gætu hafist?

„Ég mundi halda – það þarf náttúrlega - aðrir aðilar þurfa að fá leyfi. Það þarf að liggja fyrir.

Þegar það liggur fyrir, það eru kannski tvö ár í það, þá væri hægt að hefja framkvæmdir, ef að eftirspurn er fyrir orkunni þá,“ svarar forstjóri HS Orku.

Hér má sjá frétt Stöðvar 2: