Lögreglumaðurinn sem skaut Jacob Blake ekki ákærður

Saksóknari í málinu taldi ólíklegt að ákæra myndi leiða til sakfellingar lögreglumannanna og að líklega yrði fallist á málflutning þeirra að um sjálfsvörn hafi verið að ræða.

„Ef þú hefur ekki trú á því að þú getir sannað mál þitt, þannig að það sé hafið yfir skynsamlegan vafa, hefur þú þá siðferðislegu skyldu að ákæra ekki, hefur NBC-fréttastofan eftir Michael Graveley, saksóknara í Kenosha.

Lögmaður Blakes og fjölskyldu hans, Ben Crump, kveðst vonsvikinn með ákvörðun saksóknarans um að ákæra ekki lögreglumennina, og sagði Blake hafa verið fórnarlamb hryllilegrar skotárásar.

„Okkur finnst ekki aðeins að þessi ákvörðun bregðist Jacob [Blake] og fjölskyldu hans, heldur öllu samfélaginu sem mótmælti og krafðist réttlætis,“ sagði Crump. Mótmælaalda reis í Kenosha og víðar vegna málsins.

Tveir létust í mótmælunum en þeir voru báðir skotnir til bana af hinum þá 17 ára Kyle Rittenhouse í ágúst. Rittenhouse hafði ferðast sérstaklega til Wisconsin, að eigin sögn til þess að koma í veg fyrir að eignaspjöll yrðu í mótmælunum. Segist hann hafa skotið þá Joseph Rosenbaum og Anthony Huber í sjálfsvörn.

Rittenhouse gaf sig síðar fram við lögreglu og var ákærður en gengur nú laus eftir að hafa greitt tryggingu upp á tvær milljónir dala.

Kallað á þjóðvarðliðið

Fyrr í dag, áður en greint var frá ákvörðun saksóknarans um að ákæra ekki lögreglumennina sem skutu Blake í bakið, kallaði Tony Evers, ríkisstjóri Wisconsin, eftir aðstoð þjóðvarðliðsins. Gert er ráð fyrir mótmælum og jafnvel óeirðum í Kenosha vegna ákvörðunarinnar.

NPR hefur eftir ríkisstjóranum að staðaryfirvöld í borginni hafi óskað eftir því að þjóðvarðliðið yrði kallað út. Því hafa um fimm hundruð manns verið kallaðir út til þess að veita lögreglu á svæðinu aðstoð.

Meðal þeirra ráðstafana sem yfirvöld í Kenosha hafa skoðað að grípa til með það fyrir augum að draga úr mótmælum er að fækka strætóferðum, loka einhverjum vegum, koma upp sérstöku „mótmælasvæði“ og jafnvel að setja á útgöngubann.

Handjárnaður við sjúkrahúsrúmið

Hinn 29 ára Blake var skotinn sjö sinnum í bakið af lögreglumanninum Rusten Sheskey þann 23. ágúst síðastliðinn. Hann hafði gengið í átt að bílnum sínum og hallað sér inn um dyrnar bílstjóramegin þegar hann var skotinn. Synir hans þrír voru inni í bílnum.

Áður hafði lögregla beitt stuðbyssu á Blake. Sjónarvottur sem tók myndband af atvikinu segir Blake ekki hafa hegðað sér á ofbeldisfullan hátt. Lögregla hafi skipað honum að leggja frá sér hníf, en sjónarvotturinn segir Blake ekki hafa verið vopnaðan svo sjá mætti.

Lögregla segist þá hafa fundið hníf í bíl Blake og að Sheskey, einn lögreglumannanna sem höfðu afskipti af honum hafi talið að hann ætlaði sér að ræna börnunum sem voru í bílnum. Eins og áður sagði var um syni Blakes sjálfs að ræða.

Blake er nú lamaður fyrir neðan mitti. Í kjölfar þess að hann var skotinn þurftu hann þá að gangast undir aðgerð þar sem meirihluta smáþarma hans og ristils var fjarlægður. Meðan Blake lá fyrst um sinn á spítala var hann handjárnaður við rúm sitt og gætt af lögreglu, allt þar til hann greiddi tryggingargjald.