Erlent

Larry King á sjúkra­húsi vegna Co­vid-19

Atli Ísleifsson skrifar
Larry King er 87 ára gamall og dvelur nú á sjúkrahúsi í Los Angeles.
Larry King er 87 ára gamall og dvelur nú á sjúkrahúsi í Los Angeles. Getty

Bandaríski sjónvarpsmaðurinn Larry King, hefur greinst með kórónuveiruna og hefur verið lagður in á sjúkrahús í Los Angeles. Bandarískir fjölmiðlar hafa eftir heimildarmönnum að hinn 87 ára King hafi verið lagður inn á Cedars-Sinai Medical Centre vegna einkenna Covid-19 fyrir rúmri viku.

King er einn þekktasti sjónvarpsmaður Bandaríkjanna og spannar ferill hans rúma sex áratugi. Hann hefur auk þess unnið til fjölda verðlauna, meðal annars Emmy- og Peabody-verðlauna.

Larry King hefur glímt við veikindi síðustu ár og hefur oftar en einu sinni fengið hjartaáfall.

Talsmenn King hafa ekki tjáð sig opinberlega um fréttirnar um sjúkrahúslegu sjónvarpsmannsins, og í frétt BBC kemur fram að ekki liggi fyrir upplýsingar um ástand hans.

Larry King vakti mikla athygli á áttunda áratugnum með útvarpsþátt sinn, The Larry King Show. Á árunum 1985 til 2010 stýrði hann sjónvarpsþættinum Larry King Live á CNN þar sem hann ræddi við fólk úr ýmsum áttum.

Faraldur kórónuveiru (COVID-19) Bandaríkin Fjölmiðlar

Mest lesið


Fleiri fréttir

Sjá meira


×

Mest lesið