Nærri allar björgunar­sveitir höfuð­borgar­svæðisins leita Söndru Lífar

Nánast allar björgunarsveitir á höfuðborgarsvæðinu hafa verið kallaðar út í leit að Söndru Líf Þórarinsdóttur Long, 27 ára gamalli konu. Ekki er vitað um ferðir hennar síðan á skírdag og er fjölskylda hennar mjög áhyggjufull. Þau segja mjög ólíkt henni að láta ekki vita af sér.

Klukkan hálf átta í morgun barst fjölmiðlum tilkynning frá lögreglunni á höfuðborgarsvæðinu þar sem lýst er eftir Söndru Líf Long. Þar segir að ekki sé vitað um ferðir hennar síðan á skírdag. 

Sandra er 172 cm á hæð og er grannvaxin með mjög sítt rauðleitt ár. Hún yfirgaf heimili sitt í Hafnarfirði upp úr hádegi á skírdag samkvæmt upplýsingum frá fjölskyldu hennar. Þá fór hún til ömmu sinnar og afa í hádegismat og svo í heimsókn til vinkonu sinnar. Þaðan fór hún klukkan hálf sex og hefur ekki sést til hennar síðan.

Hún var klædd í svartar buxur, svartan leðurjakka og hvíta strigaskó. Hún var á bílnum sínum, ljósgráum Ford Focus, og var með síma og tösku meðferðis. Samkvæmt upplýsingum fréttastofu fannst bílinn á Álftanesi í nótt.

Björgunvarsveitir slysavarnarfélagsins Landsbjargar hafa leitað frá því klukkan hálf þrjú í nótt og verður leit haldið áfram í dag samkvæmt upplýsingum frá Davíð Má Bjarnasyni, upplýsingafulltrúa Landsbjargar. Búið sé að kalla út nánast allar björgunarsveitir á höfuðborgarsvæðinu til áframhaldandi leitar í dag. 

Leitarmenn leita fótgangandi og með drónum. Þá leitaði þyrla Landhelgisgæslunnar á Álftanesi í morgun og tekur hún þátt í leitinni í dag ásamt varðbátsins Óðins, sem einnig aðstoðaði við leit í morgun, og eftirlitsflugvélarinnar TF-SIF sem er á æfingu sem verður nýtt til leitar. 

Olga María Þórhallsdóttir Long, frænka Söndru Lífar, segir í samtali við fréttastofu að fjölskyldan sé mjög áhyggjufull. Það sé mjög ólíkt Söndru Líf að láta ekki vita af sér enda sé hún mjög náin fjölskyldu sinni. Hún sé skynsöm og ekki í óreglu. Þá hafi ekkert verið óeðlilegt við hegðun Söndru á skírdag.

Þeir sem geta gefið upplýsingar um ferðir Söndru, eða vita hvar hún er niðurkomin, eru vinsamlegast beðnir um að hafa tafarlaust samband við lögregluna í síma 112.

Fréttin hefur verið uppfærð.