Viðbúnaður í Columbine-skólanum vegna ógnar tuttugu árum eftir fjöldamorðið

Columbine-framhaldsskólinn er einn af rúmlega tuttugu opinberum skólum þar sem yfirvöld í Colorado í Bandaríkjunum hafa lýst yfir sérstökum viðbúnaði vegna þess sem þau segja „trúverðugrar ógnar“. Tuttugu ár verða liðin frá því að tveir nemendur við skólann frömdu fjöldamorð þar á laugardag.

Reuters-fréttastofan segir að skólastarf haldi áfram en að aðgangur að skólunum sé takmarkaður. Í Columbine hefur öllu starfi utan skólatíma verið aflýst í dag. Lögreglumenn gæta nú öryggis við skólana.

Alríkislögreglan FBI er sögð leita átján ára gamallar stúlku sem hafi sent inn hótanir sem beindust að Columbine-skólanum. AP-fréttastofan segir að hún sé sögð vopnuð og afar hættuleg.

Tveir nemendur skutu tólf skólafélaga sína og einn kennara til bana 20. apríl árið 1999. Þeir sviptu sig síðan lífi.