Aldrei fleiri konur í atvinnuflugnámi Keilis

Tuttugu prósent nema í atvinnuflugnámi Keilis eru nú konur en konur eru ekki nema um 7% flugmanna sem starfandi eru á landinu í dag.

Á undanförnum árum hefur kvenkyns nemendum í atvinnuflugi ört fjölgað. Hlutdeild útskrifaðra kvenna úr Flugakademíu Keilis eru um 12% frá því skólinn hóf starfsemi um tíu árum síðan og var hægt að telja fjölda þeirra á fingrum annarrar handar fyrstu árin.

Að því er séð verður er áhugi kvenna á flugnámi að aukast. Haustið 2018 leggja samtals 37 konur stund á atvinnuflugnám í Keili og hefur hlutfall kvenna aldrei verið hærra.

„Skortur á kvenkyns flugmönnum í atvinnuflugi leiðir af sér að  ungar stelpur halda að það sé eitthvað sem aftrar þeim frá því að verða atvinnuflugmenn. Mig langar til að breyta því,“ sagði Telma Rut Frímannsdóttir í ræðu sem hún hélt við útskrift atvinnuflugnema í sumar.

„Sá tími er sem betur fer liðinn þegar staðalímyndin sýndi konur í þjónustustörfum meðal farþega á meðan karlmenn sátu í stjórnklefanum. En betur má ef duga skal. Í dag eru samanlagt 807 flugmenn og flugstjórar starfandi í flugfélögum á Íslandi, þar af aðeins 57 konur eða um 7%.

Við hlökkum til að sjá kvenkyns flugnema Keilis breyta þessu hlutfalli í framtíðinni og erum þakklát að fá að leggja okkar af mörkum. Samfélagsleg kynhlutverk eiga ekki að halda aftur af draumum ungs fólks,“ segir í tilkynningu frá Keili.