Kynlífsdúkkuvændishús opnar í Árósum

„Doll House er staður þar sem allir herramenn eru velkomnir og stúlkurnar segja ekki nei.“ Þannig er fyrsta kynlífsdúkkuvændishúsi Danmerkur lýst sem opnar í Árósum í Danmörku í dag. Þar eru fimm kynlífsdúkkur í boði í fjórum herbergjum.

„Margar vændiskonur eru þvingaðar í vændi og þær njóta ekki starfs síns. Þá verður upplifunin köld fyrir viðskiptavininn en við bjóðum upp á annan kost til að fá óskum þeirra uppfyllt,“ segir eigandi staðarins sem gengur undir nafninu Óðinn, í samtali við TV2.

Svipað vændishús opnaði í Barcelona á síðasta ári og var það kallað fyrsta kynlífsdúkkuvændishús Evrópu. Þá er einnig slíka stofnun að finna í Dortmund í Þýskalandi og París í Frakklandi.

Bannað að bíta en leyfilegt að lemja

Í „Dúkku húsinu“ í Árósum eru fjögur herbergi með mismunandi þema og er til dæmis hægt að velja skólastofu eða BDSM herbergi.

Viðskiptavinir mega hvorki bíta dúkkurnar né klóra þær en leyfilegt er að berja þær.

„Viðskiptavinir geta framkvæmt fantasíur og gera hluti sem vændiskonur myndu líklega ekki leyfa. Ef þú vilt löðrunga dúkkuna eða flengja, þá skaðar það engan,“ segir Óðinn.

Hann segir að hvatinn bak við reksturinn, fyrir utan að græða peninga, sé að búa til öruggt umhverfi þar sem fólk geti prófað sig áfram með umdeildari fantasíur sínar.

Lögreglan ekki með eftirlit

Dúkkurnar eru allar gerðar úr silíkoni og stáli og beygjast liðir þeirra eins og á manneskju. Þær eru allar 148-158 sentímetra háar og um 50 kíló.

„Við erum ekki að reyna að sniðganga lög á neinn hátt. Ég tel að ef við getum komið í veg fyrir mansal og hórmang höfum við látið gott af okkur leiða til samfélagsins,“ segir Óðinn sem situr þessa dagana í fangelsi.

Lögreglan mun ekki vera með eftirlit með rekstrinum.

„Það er ekki ólöglegt að leigja út dúkkur svo að lögreglan mun ekki skipta sér af þessu að svo stöddu,“ segir Jakob Christiansen, talsmaður lögreglunnar á Austur-Jótlandi, í samtali við TV2.