Skaðabótamál gegn fyrrverandi stjórnendum Landsbankans í bígerð

Tvö skaðabótamál slitastjórnar Landsbankans gegn fyrrverandi stjórnendum bankans eru á leið til dómstóla. Skaðabótakröfurnar í málunum skipta tugum milljarða, en ítrasta krafan í stærra málinu nemur um 20 milljörðum króna.

Slitastjórn Landsbankans gaf það út í fréttum okkar í vor að hún væri að kanna skaðabótaskyldu fyrrverandi eigenda og stjórnenda.

Slitastjórnin og skilanefndin fengu til liðs við sig sérfræðiteymi á vegum Deloitte í Bretlandi til að rannsaka starfsemi bankans í aðdraganda hrunsins. Í kjölfarið tilkynnti slitastjórnin 11 tilvik, samtals að fjárhæð 250 milljörðum króna, til breskrar tryggingarmiðlunar þar sem stjórnendur eru taldir hafa bakað bankanum tjón með athafnaleysi sínu eða athöfnum og þar með valdið kröfuhöfum bankans tjóni.

Bankinn var tryggður gegn slíku hjá miðluninni fyrir 50 milljónum evra eða sem samsvarar um 7 og hálfum milljarði íslenskra króna.

Samkvæmt heimildum fréttastofu eru tvö þessara mála langt á veg komin og styttist í að slitastjórnin leggi fram stefnu í þeim.

Skaðabótakröfurnar hljóða upp á tugi milljarða króna, en krafan í stærra málinu nemur um 20 milljörðum króna. Hafa verður í huga að um ítrustu kröfur er að ræða og því allsendis óvíst hvað skilar sér á endanum í búið vinnist málin.

Gera má ráð fyrir að kröfuhöfum verði kynnt staða mála á kröfuhafafundi á morgun.