Duncan meiddist aftur

Tim Duncan, framherji San Antonio Spurs í NBA deildinni, er meiddur á sama ökkla og hélt honum frá keppni fyrir nokkrum vikum og nú gæti farið svo að kappinn yrði frá keppni það sem eftir lifir tímabils. Greg Popovich, þjálfari Spurs hefur áhyggjur af meiðslum aðalstjörnu liðsins.  "Þetta var sami ökklinn og henn sneri um daginn og þetta lítur frekar illa út núna.  Ég er viss um að hann verður frá keppni í að minnsta kosti tvær vikur." Þetta er liði San Antonio mikið áfall, því liðið er í harðri keppni um efsta sætið í deildinni sem veitir heimavallarrétt í gegn um alla úrslitakeppnina og ekki hefur árangur liðsins án Duncan verið góður í ár. Spurs hafa aðeins unnið einn leik af þeim fimm sem þeir hafa spilað án hans í vetur og því hlýtur brotthvarf hans nú að vera vatn á millu liða eins og Phoenix Suns og Miami Heat, sem eru tvö af helstu keppinautum Spurs um efsta sætið í deildinni.