„Þetta er bara víti og rautt spjald“

Leikurinn í dag var fjörugur og áður en FH skoraði á 5. mínútu voru bæði lið búin að fá góð marktækifæri. FH leiddi 2-0 í hálfleik og skoraði þriðja markið síðan eftir rúmlega mínútu leik í seinni hálfleik.

„Þetta breytti öllu en það sem ég tek út úr þessum leik er að ég er mjög ánægður með að mínar stúlkur héldu áfram allan leikinn að reyna að skora mörk. Sama hvort staðan var 2-0, 3-0 eða 4-0 þá héldum við alltaf áfram og það er aðdáunarvert hjá mínu liði,“ sagði Jón Óli en liðin eru hlið við hlið í töflunni í öðru og þriðja sæti Bestu deildarinnar.

Á 35. mínútu leiksins þurftu Avery Vanderven varnarmaður ÍBV og Mackenzie Smith varnarmaður FH báðar að fara meiddar af velli eftir að hafa skallað saman í teig FH.

Jón Ólafur er afskaplega ósáttur með að Twana Khalid Ahmed dómari leiksins hafi ekki dæmt vítaspyrnu í því atviki.

„Eins og ég sé þetta héðan, þá áttum við að fá víti þegar var hendi inni í vítateig en við fengum það ekki. Svo gerist þetta atvik þar sem okkar leikmaður skallar í átt að marki FH og er síðan skölluð í andlitið. Þetta er bara víti og rautt spjald,“ sagði Jón Ólafur. 

„Við missum besta varnarmanninn okkar útaf fyrir vikið, þær misstu ekki sinn besta varnarmann útaf. Þetta er risaatvik. Það eru fleiri hörmuleg atvik í þessum leik og á endanum fékk ég nóg.“

Jón Ólafur fékk rautt spjald í seinni hálfleik fyrir mótmæli.

„Þetta var bara verðskuldað rautt spjald, ég var bara reiður og verðskuldaði rautt spjald eftir samskipti við dómarana. Það er bara partur af þessu, maður er ekki alltaf sáttur.“

„Höldum áfram að gefa ungum leikmönnum tækifæri“

Tveir leikir eru eftir í Bestu deild kvenna en ÍBV siglir nokkuð lygnan sjó í þriðja sætinu. Framundan er landsleikjapása og framundan vinna við að halda leikmönnum við efnið.

„Það verður erfitt en við gefum ungum leikmönnum áfram tækifæri til að öðlast reynslu fyrir næsta ár. Ég lofa samt að þetta verða skemmtilegir leikir,“ sagði Jón Óli en ÍBV á eftir leiki gegn Grindavík/Njarðvík og Stjörnunni.

Hann segist ekki vita hver staðan er á Avery Vanderven eftir höfuðhöggið.

„Ekki hugmynd, hún fór upp á spítala og eflaust er þetta einhver skurður þar sem þarf að sauma 3-4 spor. Hún lagast bara í hausnum við þetta eins og við segjum.“