Ekki sé verið að normalí­sera hraða: „Beina áhættu­hegðun úr um­ferðinni“

„Almennt gildir um íþróttir að þær eru besta forvörn sem völ er á og draga almennt úr áhættuhegðun,“ sagði Willum í Reykjavík síðdegis á Bylgjunni í gær.

„Meiningin í þessu er að við snúum bökum saman hjá ÍSÍ og Akstursíþróttasambandinu og félögunum fyrst og fremst sem halda utan um þessar keppnir á þeim svæðum þar sem eru sérstakar brautir til þess. Öryggismenningin er til staðar og viðbúnaður og við viljum beina áhættuhegðuninni, áhættuakstrinum, úr umferðinni af vegunum og inn á brautir sérstaklega til þess ætlaðar.

„Þetta eru sérútbúnir bílar og fyllsta öryggis er gætt. Það eru hjálmar, hlífðarbúnaður og hlífðarskór. Þú ert festur niður í sætið,“ segir Willum sem sótti nýverið bikarmót í rallýkrossi. „Þar fékk ég að stíga inn í bíl hjá Daníel Sigurðssyni, margföldum Íslandsmeistara. Hann var þar á sérútbúnum bíl. Ég ætla að segja ykkur það, drengir, að ég hef ekki fengið svona adrenalín í æð í langan tíma þannig að að einhverju marki skilur maður þessa áhættusækni. Þetta er alveg ofboðslegt en ég var öruggur allan tímann.“

Forvarnargildi íþrótta felist í grunninn í því að starfsemin sé skipulögð.

„Þar er öryggið í fyrirrúmi. Það er aðstaða sem býður upp á það að fræða og þjálfa og ala á þessari öryggismenningu þegar unga fólkið okkar er að læra að virða hraðann og áhættuna sem í því felst og gæta fyllsta öryggis. Það eru sjálfboðaliðar og þjálfarar, þeir eru virkir þátttakendur.“

Hættuleg blanda?

En þú ert að tala þarna um að fá útrás fyrir að keyra hratt og ætla svo að keyra heim eftir að hafa keyrt svona hratt. Við erum ekki að senda krakka í fótbolta til að spila minni fótbolta eftir æfingu. Þau spila bara meiri fótbolta eftir æfingu. Er þetta ekki hættuleg blanda sem við erum að búa til þarna? Er þarna verið að normalísera hraðann?

„Alls ekki. Af því þú nefnir aðrar íþróttagreinar þá er lykilatriði í öllum rannsóknum sem draga þetta fram, sem ég var nú að þylja upp, skipulagða starfið. Hinn frjálsi leikur er auðvitað góður og gildur, en það á ekkert við um allar greinar. Eins og í bardagaíþróttum, þar sem öryggis- og hlífðarbúnaður er og keppnisreglur verja fólkið, að þú ferð og þar er lögð áhersla á að þú sért ekki að beita þeim brögðum bara úti á götu sko. Það sama gildir um þetta en þarna erum við að beina þessu inn í öryggið. Beina þessari áhættuhegðun inn í öryggið. Þetta gildir raunverulega um allar íþróttir, þetta skipulagða starf. Það er það sem skilur á milli.“

Viðtalið við Willum Þór Þórsson, forseta ÍSÍ, í Reykjavík síðdegis í gær má hlusta á í heild sinni í spilaranum hér ofar í fréttinni.