Búa sig undir annað á­hlaup á Ceuta

Skilaboðin sem ganga manna á milli á samfélagsmiðlum í Marokkó ganga út á að landamærin að Ceuta, spænsku yfirráðasvæði við Miðjarðarhafsströnd Marokkó, verði opin á morgun, laugardag, þar sem þá sé hátíðsdagur á Spáni.

Tugir þúsunda förufólks fór ólöglega inn í Ceuta dagana 30. og 31. júlí. Um fimm þúsund þess er sagt enn í spænsku borginni. Spænsk stjórnvöld vinna enn að því að vísa þeim frá borginni.

Spænska blaðið El País segir að marokkósk yfirvöld hafi brugðist við kallinu eftir nýju áhlaupi á Ceuta með því að senda hundruð hermanna að landamærunum og koma fyrir hindrunum og tálmum við þau.

„Það hefur verið gripið til allra nauðsynlegra aðgerða til þess að koma í veg fyrir allar tilraunir til þess að fara ólöglega yfir landamærin og stöðva hvern þann sem reynir að taka þátt í því,“ hefur blaðið eftir Rachid el Jalfi, talsmanni marokkóska innanríkisráðuneytisins.

Fernando Grande-Marlaska, spænski innanríkisráðherrann, sendi þau skilaboð til förufólksins að enginn fái að verða um kyrrt í Ceuta og að enginn fái að komast þaðan upp á meginland Spánar.

Flóttamannastraumurinn til Ceuta hefur valdið nokkrum titringi í Evrópu. Ítölsk stjórnvöld komu upp landamæraeftirliti fyrir ferðalanga frá Spáni en spænska ríkisstjórnin svaraði í sömu mynt. 

Fulltrúar spænskra stjórnvalda hafa fullyrt að engin hætta steðji að Schengen-svæðinu vegna fjöldaflóttans inn í Ceuta. Enginn hafi komist þaðan til Íberíuskaga handan Miðjarðarhafsins frá borginni.