Far­þegar elska lopa­peysur

Þegar stóru skemmtiferðaskipin mæta norður á Akureyri koma sjálfboðaliðar Rauða krossins sér fyrir við gamla Landsbankahúsið með alls konar prjónuð föt. Þótt úti séu átján gráður líkt og þegar fréttastofa leit við eru ferðamenn duglegir að versla.

„Við erum að selja bæði nýprjónaðar peysur og notaðar. Húfur, vettlingar og sokkar. Þetta er mestallt nýtt,“ segir Ragnhildur Ingólfsdóttir, sjálfboðaliði hjá Rauða krossinum. 

Salan gangi vel en fötin koma ýmist frá sjálfboðaliðunum sjálfum eða fólki í nágrenninu sem prjónar og gefur Rauða krossinum til að selja. Ferðamennirnir, sem flestir eru erlendir en einhverjir íslenskir, verði ekki sviknir af því að versla peysu á básnum.

Þetta eru engar túristapeysur, þetta er alvöru íslensk ull?

„Þetta eru íslenskar handprjónaðar peysur,“ segir Ragnhildur. 

Fjölmargir sjálfboðaliðar taka þátt í starfi Rauða krossins á Akureyri.

„Margir, margir sjálfboðaliðar, það eru flestir sjálfboðaliðar,“ segir Ragnhildur. 

Hvers vegna gefur þú þér tíma í eitthvað svona?

„Mér finnst þetta gaman og þegar maður er kominn á aldur er gaman að hafa eitthvað að gera. Þetta gefur manni heilmikið,“ segir Ragnhildur.