Ingi­björg og Tómas taka við af Þórunni hjá Úr­val Út­sýn

Ingibjörg Elsa Eysteinsdóttir og Tómas J. Gestsson taka við af Þórunni Reynisdóttur sem, líkt og greint var frá í morgun, mun láta af störfum sem forstjóri Úrvals Útsýnar, eftir ellefu ára starf. Ingibjörg verður forstöðumaður Úrvals Útsýnar, en Tómas verður forstjóri Ferðaskrifstofu Íslands.

Þetta kemur fram í tilkynningu.

Ferðaskrifstofa Íslands er skipuleggjandi allra ferða sem seldar eru af Úrval Útsýn.

Í tilkynningunni segir að Ingibjörg muni leiða starfsemi félagsins áfram með skýra áherslu á vöxt, öflugt vöruframboð og góða þjónustu við viðskiptavini. Ingibjörg ber ábyrgð á framleiðslu og sölu ferða á vegum vörumerkjanna Úrvals Útsýnar, Sumarferða og Plúsferða.

Þá muni Tómas J. Gestsson gegna sínu starfi samhliða því að stýra Heimsferðum, en Tómas hefur verið við stjórnvölinn þar í rúm tuttugu ár.

„Ferðaskrifstofa Íslands er eitt öflugasta fyrirtæki í ferðaþjónustu á Íslandi og býr að sterkum vörumerkjum, mikilli reynslu og öflugu starfsfólki. Fram undan eru spennandi tækifæri til að styrkja reksturinn enn frekar og þróa fjölbreytt framboð félagsins. Ég hlakka til að vinna með Ingibjörgu og starfsfólkinu að næsta kafla í sögu félagsins,“ er haft eftir Tómasi.

„Það er mikil tilhlökkun að takast á við þetta verkefni. Vörumerki Ferðaskrifstofu Íslands eiga sér sterka stöðu og langa sögu. Við ætlum að byggja áfram á þeim grunni, efla vöruframboðið og sækja fram með þarfir og upplifun viðskiptavina að leiðarljósi,“ er haft eftir Ingibjörgu.