Fimm­tíu og sjö með stöðu sak­bornings vegna van­rækslu brúar

Þann 14. ágúst 2018 hrundi langur kafli Morandi-brúarinnar í Genóa á Ítalíu í kjölfar mikillar úrkomu og fjörutíu og þrír létu lífið.

Saksóknarar kröfðust þess að fimmtíu og sjö manns yrðu dæmdir samanlagt í fjögur hundruð ára fangelsi fyrir að hafa vanrækt viðhald brúarinnar en hún var byggð árið 1967. Saksóknarar héldu því fram að viðhaldi á brúnni hefði ítrekað verið frestað og viðvaranir hunsaðar en allir fimmtíu og sjö neituðu sök í málinu segir í umfjöllun BBC. 

Giovanni Castellucci, fyrrverandi forstjóri ítalska vegagerðarfyrirtækisins Autostrade per l'Italia (Aspi), var dæmdur í tólf ára en hann afplánar þegar sex ára dóm fyrir umferðaslys frá árinu 2013. Annar háttsettur embættismaður Aspi, Michele Donferri Mitelli, var dæmdur í ellefu ára fangelsi. Alls voru þrjátíu og tveir sakfelldir vegna málsins.

Meðal annarra sakborninga voru verkfræðingar viðhaldsfyrirtækis og fyrrverandi embættismenn samgönguráðuneytis. Fyrrverandi forstjóri viðhaldsfyrirtækisins SPEA var dæmdur í fimm og hálfs árs fangelsi og fyrrverandi yfirmaður samgönguráðuneytisins fékk fimm ára dóm. 

Í gær baðst núverandi forstjóri Aspi formlega afsökunar á slysinu fyrir hönd fyrirtækisins í fyrsta sinn. Hann sagði að „aðgerðir og ákvarðanir sumra“ hefðu skilið eftir sig „varanleg ör“.