Neytendastofa tæklar bílastæðamálin

Í ákvörðununum komst stofnunin að þeirri niðurstöðu að félögin hefðu brotið gegn lögum og reglum sem stofnunin hefur eftirlit með. Um er að ræða fyrirtækin Green Parking, Sanna Landvætti og Kvasi Lausnir auk ISAVIA ohf.

Brot fyrirtækjanna fólust meðal annars í rangri upplýsingagjöf um greiðslulausnir, ófullnægjandi merkingum um gjaldskyldu, skorti á verðupplýsingum og því að upplýsingar um vangreiðslugjald voru ekki birtar með áberandi og auðsjáanlegum hætti.

Brotin varða meðal annars bílastæði ISAVIA við flugvelli á Akureyri og Egilsstöðum, bílastæði Sannra Landvætta við Hjörleifshöfða, bílastæði Kvasis Lausna við Seljalandsfoss og í bílakjallaranum Höfðatorgi og bílastæði sem Green Parking þjónustaði við Landspítalann á Hringbraut.

Neytendastofa taldi tilefni til að beita stjórnvaldssektum í málunum og námu sektarfjárhæðirnar frá tvö til fjögur hundruð þúsund krónum.

Neytendastofa sendi fyrirtækjunum öllum bréf þar sem brot þeirra voru tilgreind. Var fyrirtækjunum gefið færi á að bæta úr og fá í kjölfar þess aftur endurgjöf frá Neytendastofu áður en ákvörðun hennar var tekin.