Sjöfaldur NBA-meistari mætir til landsins í ágúst

Robert Horry er einn sigursælasti leikmaður NBA-sögunnar og einn af fáum sem hafa unnið titilinn sjö sinnum, með Houston Rockets 1994 og 1995, með L.A. Lakers 2000, 2001 og 2002 og síðan San Antonio Spurs 2005 og 2007.

„Markmið Elite Camp Iceland er að færa íslenskum iðkendum aðgang að fremstu sérfræðingum og fyrirmyndum úr heimi körfuboltans. Robert Horry er ekki aðeins sjöfaldur NBA-meistari heldur lifandi dæmi um aga, seiglu, liðsheild og vinnusemi. Við erum afar stolt af því að fá hann til Íslands,“ segir í fréttatilkynningu frá Elite Camp Iceland.

Árið 2025 sóttu búðirnar þátttakendur víðs vegar að af landinu og tveir þátttakendur fóru síðar í framhaldsskólanám og körfubolta í Bandaríkjunum í kjölfar tengslanets sem myndaðist í búðunum.

Búðirnar eru ætlaðar iðkendum á aldrinum 7–17 ára og leggja áherslu á tæknilega færni, leikskilning, leiðtogahæfni, aga og persónulegan þroska. Fjöldi þekktra NBA-leikmanna, þjálfara og sérfræðinga mun taka þátt í dagskránni. Hægt er að nálgast upplýsingar um námskeiðið hér.