Eldræða Arnars: „Hlaupa og senda fingurinn upp í stúku“

Grindavík vann nauman 86-83 sigur eftir spennandi leik. Mikið munaði um Unnstein Rúnar Kárason sem setti mikilvægt þriggja stiga skot á lykilaugnabliki og var svo eitursvalur á vítalínunni undir lok leiks.

„Unnsteinn setti stórt skot sem fór með þetta þar sem við vorum klaufar. Við hefðum getað stoppað þá í hraðaupphlaupinu og náðum því ekki. Hann skoraði. Kredit á hann,“ segir Arnar um muninn á liðunum í samtali við Andra Má Eggertsson eftir leik.

„Þetta er bara hörkuleikur. Það er aðallega byrjunin á þriðja leikhlutanum sem var ekki nógu góður hjá okkur. Þetta verður þá að smá götubolta leik. Það hentar þeim betur.“

Það virtist ætla að sjóða upp úr eftir leik þegar DeAndre Kane, leikmaður Grindavíkur, gekk heldur hressilega fram í fagnaðarlátum að mati heimamanna og hann lenti í einhverjum útistöðum við stjórnarmenn Tindastóls.

Í viðtalinu höfðu þeir Arnar og Andri Már rætt frekar um leikinn og gerðu hann upp á svipuðum nótum og að ofan.

Greip orðið og var mikið niðri fyrir

Þegar Andri ætlaði að ljúka viðtalinu greip Arnar hins vegar orðið og vísaði þar til hegðunar Grindvíkinga.

„Ég ætla að fá að bæta einu við. Hegðun sem er ekki tekið á, er samþykkt. Það er bara guðs lukka, eins og gerðist í Grindavík í 8-liða úrslitum, haugur af fólki inn á völlinn þegar leikmenn hlaupa og senda fingurinn upp í stúku,“ segir Arnar sem var mikið niðri fyrir.

„Bara eins og foreldrar þínir við þig, ef þú ert ekki leiðréttur, þá er hegðunin samþykkt. Það er líka hægt að horfa á leik eitt þar sem leikmenn kasta bolta í leikmann eftir leik, þar sem þeir labba utan í aðra leikmenn á leið í leikhlé,“

„Þar er ég ekki að tala um körfuboltatengda hluti. Ég er bara að tala um almennan fíflagang, þegar hegðun er ekki leiðrétt er það sama og hún sé samþykkt,“ segir Arnar.

Þú ert þá að tala um DeAndre Kane?

„Já, já. Við höfum þurft að taka á okkar hlutum“ sagði Arnar og nefndi tvö dæmi af eigin leikmönnum.

„Arnar Björnsson fær tæknivillu í leik eitt á móti Stjörnunni fyrir að taka boltann úr höndunum á Pablo Bertone, þið getið fundið þessa klippu. Tæknivilla, hárrétt. Hann hefur hagað sér síðan þá,“

„Adamas Drungilas fær tæknivillu í leik fimm fyrir að öskra í andlitið á Hilmari Hennings. Hárrétt, hegðunin er leiðrétt. Það á og skal það sama yfir alla að ganga,“ sagði Arnar.