Ræddi við Pútín í síma og í­hugar að slaka frekar á refsiaðgerðum

Yfirvöld í Kreml sögðu frá símtalinu í gærkvöldi og birtu yfirlit yfir hvað forsetarnir eiga að hafa rætt sín á milli. Í yfirlýsingu segir ráðgjafi Pútíns að símtalið hafi verið hefðbundið. Forsetarnir hefðu ekki talað saman síðan í desember og að báðir hafi sammælst um að ræða oftar saman.

Samkvæmt ráðgjafanum mun Pútín hafa lagt til leiðir til að binda enda á stríðið gegn Íran, sem er bandalagsríki Rússlands. Þá mun Trump hafa ítrekað áhuga sinn á því að binda enda á stríð Rússa gegn Úkraínu eins fljótt og hægt væri.

Sjá einnig: Íranir enn víg­reifir

Í yfirlýsingunni segir að Trump hafi verið gert ljóst að Rússar sæktu fram víða á víglínunni í Úkraínu og það ætti að hvetja yfirvöld í Kænugarði til að semja „loksins“ um endalok stríðsins.

Ráðamenn í Rússlandi hafa lagt mikið kapp á að halda því fram við Trump og ráðgjafa hans að sigur þeirra í Úkraínu sé óhjákvæmilegur og að það séu Úkraínumenn sem standi í vegi friðar með því að verða ekki við kröfum Rússa.

Sagði símtalið „mjög gott“

Trump-liðar í Hvíta húsið hafa ekkert  sagt um símtalið en Trump sagðist á blaðamannafundi í gær hafa átt „mjög gott“ símtal við Pútín. Trump sagði að Pútín hefði viljað hjálpa hvað varðar stríðið gegn Íran, samkvæmt frétt Reuters.

„Ég sagði: „Þú gætir hjálpað meira með því að binda enda á Úkraínu-Rússland stríðið. Það væri meiri hjálp í því.““

Stutt er síðan ríkisstjórn Trumps slakaði á viðskiptaþvingunum í garð Rússlands með því að leyfa Indverjum að kaupa rússneska olíu og sleppa við refsiaðgerðir. Trump gaf til kynna í gærkvöldi, eftir símtalið við Pútín, að von væri á frekari tilslökunum, eins og fjölmiðlar ytra hafa sagt til skoðunar í Hvíta húsinu.

Sjá einnig: Rússar hjálpa Írönum að finna skot­mörk

Án þess að nefna Rússland sagði hann að markmiðið væri að lækka olíuverð. Hann sagði að þvinganir yrðu felldar niður tímabundið en sagði að mögulega yrðu þær ekki settar á aftur. Þess þyrfti kannski ekki, þar sem það yrði „svo mikill friður“.