Fastur í Ísrael og leitar skjóls í neðanjarðarbyrgjum

„Auðvitað er þetta óþægileg upplifun og allt það, en við gætum samt verið í verri stöðu miðað við aðra Íslendinga sem maður hefur heyrt og lesið um undanfarna daga sem eru stödd hérna í heiminum,“ segir Sveinbjörn í skriflegum svörum við fyrirspurn Vísis.

„Við erum örugg þar sem við búum og erum með neðanjarðarbunker [byrgi] sem við hoppum í þegar þess þarf. Við erum nýkomin upp eftir að hafa þurft að hoppa niður,“ bætti hann við.

Sveinbjörn hefur búið í Ashdod í Ísrael ásamt þýskri eiginkonu sinni síðustu tvö árin tæplega. Þau fluttu þangað til lands frá Þýskalandi þegar Sveinbjörn gerði samning við handboltaliðið Hapoel Ashdod árið 2024.

Úrslitakeppnin í ísraelsku úrvalsdeildinni átti að hefjast í dag en öllum leikjum hefur verið frestað til 27. mars hið fyrsta. Liðið fékk að fara á æfingu í gær í fyrsta sinn síðan átökin brutust út en hún gekk ekki stopplaust fyrir sig.

„Það eru varúðarsírenur reglulega ef eitthvað gæti verið á leiðinni hingað og þá fer maður á öruggan stað á meðan það gengur yfir,“ segir Sveinbjörn.

Íslendingum á átakasvæðum í Mið-Austurlöndum hefur verið boðið björgunarflug af borgaraþjónustu utanríkisráðuneytisins, en þau flug fara frá Amman í Jórdaníu og Riyaj í Sádi-Arabíu. Líkt og fleiri Íslendingar sá Sveinbjörn sér ekki fært að fara í þau flug.

„Ekki á leið héðan eins og er, utanríkisráðuneytið bauð uppá flug frá Jórdaníu eða Sádi-Arabíu ef maður gæti reddað sér þangað, sá bíltúr er ekki að fara að gerast af minni hálfu,“ segir Sveinbjörn.

„Ef ég gæti bara rúllað upp á völl til Tel-Aviv í dag myndi ég taka flugið heim, það er alveg þannig,“ svaraði hann aðspurður um hvort hann myndi vilja fara frá Ísrael.