Hóta að grípa til hernaðar­að­gerða gegn Íran

Yfirlýsingin var birt í kvöld í nafni Keirs Starmer forsætisráðherra Bretlands, Emmanuel Macron Frakklandsforseta og Freidrich Merz Þýskalandskanslara. Þar fordæma þeir „handahófskenndar og óhóflegar“ eldflaugaárásir Írans á nágrannalönd sín, þeirra á meðal lönd sem áttu engan beinan þátt í árásum Bandaríkjanna og Ísraels.

„Gáleysislegar árásir Írans hafa beinst að nánum bandamönnum okkar og ógna starfsfólki okkar í herþjónustu og almennum borgurum um allt svæðið.“

„Við munum grípa til aðgerða til að verja hagsmuni okkar og bandamanna okkar á svæðinu, hugsanlega með því að heimila nauðsynlegar og réttmætar varnaraðgerðir til að gera út af við getu Írans til að skjóta eldflaugum og drónum,“ segir í yfirlýsingunni.

Þar kemur einnig fram að leiðtogarnir hafi samþykkt að vinna saman með Bandaríkjunum og bandamönnum á svæðinu að þessu marki.