Sak­sóknarar hóta upp­reisn í Minneapolis

Margir saksóknarar eru sagðir hafa sagt Daniel Rosen, ríkissaksóknara sem skipaður var af Donald Trump, á fundi í vikunni að þeir væru líklegir til að hætta og að minnsta kosti einn hefur þegar hætt, samkvæmt heimildum Washington Post.

Good og Pretti voru skotin með rúmlega tveggja vikna millibili en þau atvik hafa leitt til mikillar reiði. Dómsmálaráðuneyti Bandaríkjanna hefur staðið í vegi þess að löggæsluembætti og saksóknarar í Minnesota hafi getað rannsakað banaskotin, sem eru bæði mjög svo umdeild. Yfirvöld í Minnesota vita til að mynda ekki hvað mennirnir tveir sem skutu Pretti til bana heita en þeir voru fljótt fluttir úr ríkinu.

Þó nokkrir alríkissaksóknarar hættu fyrr í mánuðinum, eftir að embættismenn úr ráðuneytinu sögðu þeim að skoða ekki banaskot Good, heldur reyna frekar að byggja mál gegn maka hennar.

Eftir þær uppsagnir voru aðrir saksóknarar úr öðrum ríkjum sendir til Minnesota til að aðstoða saksóknarana sem eftir voru þar en gífurlega mikið álag hefur verið á þeim vegna aðgerða heimvarnaráðuneytisins og útsendara stofnana þess í ríkinu.

Um sjötíu alríkissaksóknarar eiga að starfa fyrir ríkissaksóknarann en svo margir hafa hætt á undanförnum mánuðum að um helmingur starfanna eru ófyllt, samkvæmt frétt WP.

Rannsaka kollega sína en fá ekki sönnunargögn

Við hefðbundnar kringumstæður koma útsendarar Alríkislögreglu Bandaríkjanna (FBI) og saksóknarar að rannsókn á því þegar alríkisútsendarar skjóta borgara til bana. Það er þá rannsakað sem mögulegt brot á borgaralegum réttindum þess sem var skotinn.

Eftir að Good var skotin hófst slík rannsókn innan FBI en blaðamenn vestanhafs segja að hún hafi verið stöðvuð fljótt. Þess í stað stóð til að reyna að ákæra maka hennar.

Staðan virðist svipuð þegar kemur að banaskoti Pretti. Þar hafa útsendarar heimavarnaráðuneytisins fengið það hlutverk að rannsaka kollega sína. CNN sagði frá því í gær að þeir hefðu takmarkaðan aðgang að upplýsingum og sönnunargögnum sem búið væri að afla.

Trump hefur þó talað fyrir því að hann vilji ítarlega rannsókn á dauða Pretti.

„Ég vil sjá þessa rannsókn. Ég mun fylgjast með henni og vil að hún verði virðingarfull og heiðarleg. Ég verð að sjá hana sjálfur,“ sagði Trump í dag.

Foreldrar Pretti hafa ráðið fyrrverandi alríkissaksóknara sem kom að því að lögsækja lögregluþjónana sem myrtu George Floyd um árið. Sá er mjög reynslumikill en AP hefur eftir talsmanni fjölskyldunnar að hann hafi boðist til að vinna launalaust fyrir þau.