Snýr aftur í ál­verið en nú sem for­stjóri

Í fréttatilkynningu þess efnis segir að Sunna Björg hafi langa og fjölbreytta reynslu af stjórnunarstörfum meðal annars á sviði áliðnaðar og orkuframleiðslu. Sunna Björg komi til Straumsvíkur frá HS Orku, þar sem hún hafi verið framkvæmdastjóri tæknisviðs síðan 2020. Áður hafi Sunna Björg starfað sem framkvæmdastjóri tæknisviðs hjá Alvotech á árunum 2016 til 2020. Sunna Björg þekki vel til starfsemi Rio Tinto á Íslandi en hún hafi starfað hjá fyrirtækinu á árunum 2001 til 2015, síðast sem framkvæmdastjóri kerskála.

Sunna Björg sé með B.Sc. gráðu í efna- og vélaverkfræði frá Háskóla Íslands og M.Sc. gráðu í rekstrarverkfræði frá Háskólanum í Reykjavík.

„Það er mér mikil ánægja að snúa aftur til starfa hjá Rio Tinto á Íslandi, sem ég þekki vel af fyrri störfum. Fyrirtækið er rótgróið en hefur jafnframt verið í stöðugri þróun og gegnt lykilhlutverki í íslenskum iðnaði í meira en hálfa öld. Það er svo sannarlega spennandi að taka við fyrirtæki sem byggir á svo traustum grunni og skýrri framtíðarsýn. Ég hlakka mikið til að leiða félagið áfram með þeim frábæra hópi starfsfólks, sem hefur verið undirstaðan að farsælum rekstri þess síðustu ár,“ er haft eftir Sunnu Björgu.

„Ráðning Sunnu Bjargar markar tímamót fyrir álverið í Straumsvík, þar sem Rannveig Rist hefur átt farsælan og eftirtektarverðan feril sem forstjóri í tæp 30 ár. Víðtæk og fjölbreytt reynsla Sunnu mun nýtast einkar vel, bæði í rekstri sem og þróun álversins til framtíðar. Starfsreynsla hennar hjá fyrirtækinu veitir auk þess mikilvæga tengingu við starfsemi og starfsfólk fyrirtækisins. Það er alltaf ánægjulegt þegar fyrrum starfsfólk snýr aftur til fyrirtækisins reynslunni ríkari. Jafnframt vil ég nýta tækifærið til að þakka Rannveigu Rist fyrir hennar mikilsverða og dýrmæta starf. Rannveig er sannkallaður brautryðjandi og framlag hennar til fyrirtækisins og áliðnaðarins verður seint fullþakkað. Hún hefur mótað fyrirtækið með framúrskarandi leiðtogahæfileikum, framsýni og hugrekki,“ er haft eftir Sébastien Ross, framkvæmdastjóra Aluminium Atlantic hjá Rio Tinto.