Kol­brúnu Berg­þórs sagt upp á Mogganum

Áður hefur verið greint frá því að Víði Sigurðssyni fréttastjóra íþróttadeildar Morgunblaðsins og mbl.is hafi verið sagt upp störfum hjá Árvakri útgáfufélagi blaðsins. Vísir hefur ekki náð tali af stjórnendum vegna málsins. Þremur blaðamönnum á miðlinum hafði áður verið sagt upp í nóvember.

„Þetta er alveg í góðu lagi, mér er alveg sama um sjálfa mig en Víðir er stjarna, það er fáránlegt að segja honum upp. Ég hef ekki einu sinni lesið uppsagnarbréfið mitt. Núna get ég sofið út í janúar og febrúar,“ segir Kolbrún sem er stödd úti í London.

Kolbrún hefur starfað á miðlinum síðan í janúar 2023 og skrifað pistla í blaðið og greinar í sunnudagsblað Moggans. Kolbrún hefur starfað við blaðamennsku í meira en 25 ár, starfað á Fréttablaðinu, Morgunblaðinu áður og DV svo fátt eitt sé nefnt. Þá þekkja landsmenn hana vel af skjánum þar sem hún hefur verið fastagestur í bókmenntaþættinum Kiljunni um árabil.

Kolbrún er einn þekktasti pistlahöfundur landsins og vekja pistlar hennar gjarnan landsathygli. Þannig hafa nýlegir pistlar hennar um Sjálfstæðisflokkinn sem dæmi vakið gríðarlega athygli og sagði Kolbrún við Vísi í apríl að hún væri vön því að standa á sínu á ritstjórnargólfi Morgunblaðsins.

Kolbrún var heimsótt í Hádegismóa í febrúar 2023 af þáverandi sjónvarpsmanninum Snorra Mássyni í Íslandi í dag þegar hún hafði nýhafið störf.