„Konan hans hlýtur að taka á honum þegar hún heyrir þetta“

Diljá Mist var nýjasti gestur Þórarins í hlaðvarpi hans, Einni pælingu. Þau ræddu þar um kulnun, sveitastjórnarkosningar í vor, útlendingamál og kvenréttindi.

Þórarinn spurði Diljá hvers vegna ungar konur væru orðnar svona spenntar fyrir Miðflokknum. Nefndi hann í því samhengi Hlédísi Maren Guðmundsdóttur félagsfræðing sem hefur gert sig gildandi í umræðunni, sagt að feðraveldið orsaki ekki kynbundið ofbeldi og notað frasann gellupólitík um sýndarsamstöðu kvenna um „baráttulausan femínisma“.

„Ég held það sé aðeins uppblásið,“ sagði Diljá um fylgi kvenna við Miðflokkinn. „Þegar ung íhaldskona eins og ég er farin að fá hroll yfir málflutningi ungra kvenna sem kenna sig við Miðflokkinn þá held ég að það sé gott að þú nefnir það.“

Diljá lét Þórarinn síðan heyra það vegna afstöðuleysis hans í samræðum við fyrri gesti hans þar sem rætt var um barneignir kvenna og eðli þeirra.

„Mér hefur nú þótt sumt sem hefur komið úr þessari átt hljóma bara eins og Halim Al að tala. Þegar það er verið að tala um það að konur séu að eyða sínum mikilvægustu frjósemisárum í skyndikynni. Þegar það er verið að tala um það að lækkun barneignatíðni megi rekja til þess að konur séu að afneita sínu kveneðli. Ég fæ bara raunverulega gæsahúð, bara óþægindatilfinningu,“ sagði Diljá.

„Eins og talað úr mínum munni,“ svaraði Þórarinn og flissuðu þau bæði.

„Tóti, ég var að fara að koma að þér. Því ég hef hlustað á þig sitja undir þessari orðræðu kinkandi kolli og ég hef hugsað: „Djöfull mun Tóti fá að finna fyrir því“,“ sagði Diljá þá.

„Djöfull ætla ég að taka á honum,“ bætti Tóti við.

„Nei, konan hans hlýtur að taka á honum þegar hún heyrir þetta. Þetta hljóta að vera þrjár vikur heima. Situr þú þarna undir þessu ótrúlega furðutali og bara: „Nákvæmlega, konurnar aftur heim“,“ sagði Diljá.

„Ég bara les ekki í það þannig. Þegar ég er með viðmælendur þá er ég eiginlega alltaf kinkandi kolli út af því ég er að pæla í því sem þeir eru að segja,“ svaraði Þórarinn.

Viðhorf aftur úr fornöld

Diljá sagði hann eiga að skammast sín að sitja þegjandi undir slíkum málflutningi. Hún viðurkenndi sjálf að hafa í gegnum tíðina hrist höfuðið yfir „reiðum vinstrikonum“ og Höllu Gunnnarsdóttur sem vildi banna g-strengi. Önnur hlið á þeim teningi væri komin fram.

„Nú finnst mér ég vera komin með klofning af einhverjum Framsóknarkonum sem eru bara að fara aftur til fornaldar með einhver viðhorf um það að konur eigi að nýta betur sín bestu frjósemisár,“ sagði Diljá.

Hún velti því fyrir sér hvort konur sem töluðu svona hefðu reynslu af því að vera ungar konur með börn. 

„Það er búið að berjast fyrir þessum réttindum fyrir okkur, meðal annars með því að tryggja dagvistun barna og fæðingarorlofsréttindi. Þetta hefur verið mikið hugðarefni kvenna síðustu áratugi og við höfum náð ákveðnum stað. En hvað hefur síðan klikkað?“ sagði Diljá.

Hún nefndi að karlar hefðu ekki stígið nægilega upp á heimilinu til að létta þar undir konum. Einnig nefndi hún breytta stöðu hjá ömmum og öfum sem hafi í gegnum tíðina sinnt barnapössun. Taldi Diljá að ræða mætti málin miklu betur en það væri enginn skortur á skömmum og skilaboðum til ungra kvenna um að þær ættu að vera meira með börnum sínum.

„Ég hvet ungar konur sem kenna sig við Miðflokkinn til þess að víkka sjóndeildarhringinn í þessum efnum og kynna sér þetta betur,“ sagði Diljá svo.

„Ég vissi ekki að ég væri kominn með Þorstein V í settið,“ sagði Þórarinn þá og vísaði í kynjafræðinginn Þorstein V. Einarsson.