Eyddu illa fengnum milljónum í bíla og rafmyntir

Greint var frá því á Vísi í dag að lögregla hafi nú til rannsóknar fjársvik upp á um fjögur hundruð milljónir króna af íslensku bönkunum. Fimm eru í farbanni vegna málsins en einstaklingum tókst að millifæra háar upphæðir af eigin reikningum án þess að inneign væri til staðar vegna galla hjá Reiknistofu bankanna.

Málið uppgötvaðist hjá Landsbankanum á föstudaginn en það rataði á borð lögreglunnar á höfuðborgarsvæðinu á laugardaginn. Agnes Ósk Marzellíusardóttir lögreglufulltrúi hjá miðlægri rannsóknardeild lögreglu segir í kvöldfréttum Sýnar að lögregla hafi kært úrskurð héraðsdóms sem hafnaði gæsluvarðhaldskröfu lögreglu.

Óvenjulegt og mjög umfangsmikið mál

„Það var strax ljóst að það væri umfangsmikið, þannig við hófumst strax handa í að reyna að kanna það hvort við gætum endurheimt eitthvað. Okkur hefur tekist það upp að einhverju marki. Við fórum fram á gæsluvarðhaldsúrskurð yfir fimm aðilum. Því var hafnað af héraðsdómi en sá úrskurður hefur verið kærður.“

Hún segir lögreglu hafa grunsemdir um að mennirnir fimm sem eru í haldi tengist, það sé til rannsóknar. Það sé til rannsóknar hvernig þeir hafi nýtt sér glufur í kerfinu.

Hvað er það sem þið hafið lagt hald á, það er talað um fjögur hundruð milljónir?

„Já, þetta eru um fjögur hundruð milljónir en ég er ekki með það nákvæmlega hversu há þessi upphæð er, en hún er í formi bifreiða, þetta er í formi rafmynta og svo að sjálfsögðu bara reiðufé.“

Agnes segir töluverða vinnu framundan hjá lögreglu. Hún hafi því talið nauðsynlegt að kæra úrskurð héraðsdóms.

Teljið þið að þetta geti jafnvel verið enn hærri fjárhæðir?

„Við bara hreinlega vitum það ekki. Það verður bara tíminn að leiða í ljós og bankar að skoða sín mál.“

Er þetta ekki óvenjulegt?

„Þetta er óvenjulegt og mjög umfangsmikið.“