Eig­andi Remax á­kærður fyrir markaðsmisnotkun

 Í ákæru kemur fram að meint misnotkun hafi farið fram árið 2020 á um tveggja mánaða tímabili og að hann hafi í 71 skipti lagt fram viðskiptafyrirmæli um kaup á hlutabréfum í Kviku banka hf. sem voru líkleg til að gefa ranga eða villandi mynd af eftirspurn og verði hlutabréfanna.

Í ákæru segir enn fremur að brotin hafi verið framin með því að ganga kerfisbundið og ítrekað að hagstæðasta sölutilboði [e. ask] þegar það var hærra en síðasta viðskiptaverð, án þess að lögmæt viðskiptaleg sjónarmið hafi búið þar að baki, og setja inn fjölda kauptilboða sem leiddu til pörunarviðskipta sem voru til þess fallin að gefa ranga og villandi mynd af verði og eftirspurn eftir hlutabréfum í Kviku banka hf.

Þá segir að með viðskiptunum hafi Þórarinn og IREF ítrekað átt síðustu viðskipti með hlutabréf í Kviku banka hf. innan viðskiptadags og þannig stuðlað að hækkun dagslokaverðs bréfanna eða að dagslokaverð endaði í efri mörkum fyrirliggjandi verðbils.

Héraðssaksóknari krefst þess að Þórarinn Arnar verði dæmdur til refsingar og til greiðslu alls sakarkostnaðar.

Félög sem voru tengd Þórarni

Í ákæru segir að IREF sé ákært vegna refsiábyrgðar RPF ehf. sem IREF hafi yfirtekið 2021. Þá kemur einnig fram að viðskiptin hafi verið stunduð í aðdraganda þess að félögin Loran, RPF ehf., IREF ehf. og Premier eignarhaldsfélag, allt félög sem tengd voru Þórarni, gerðu upp framvirka samninga með hlutabréf í Kviku banka hf. og seldu hlutabréf sín í sama félagi.

Í ákæru segir að viðskiptin hafi verið villandi eða verið líkleg til að vera villandi fyrir fjárfesta sem aðhafist á grundvelli birts sér, sérstaklega síðasta viðskiptaverðs og lokaverðs. Í því samhengi sé létt að líta til tíðni viðskiptafyrirmælanna og tilgangs viðskiptanna sem hafi verið að gera tengdum félögum kleift að selja beinan og óbeinan eignarhlut sinn í Kviku banka hf. á hagstæðara verði en ella hefði fengist.

Einnig verði að horfa til þess að viðskiptin hafi átt sér stað á tiltölulega grunnum markaði þannig að tíðni viðskiptanna hafi verið líkleg til að hafa langvarandi áhrif á birtingu síðasta viðskiptaverðs yfir daginn og stuðla að því að dagslokaverð yrði hærra en ella.

Bein áhrif á dagslokaverð

Að lokum þurfi að horfa til þess að vegna þess að um grunnan markað hafi verið að ræða hafi ákærðu getað átt síðustu viðskipti dagsins og hátu þannig haft bein áhrif á dagslokaverð án þess að þurfa að eiga í viðskiptum skömmu fyrir lokun markaða. Ákærðu áttu þó einnig í viðskiptum skömmu fyrir lokun markaða.

„Viðskiptin snerust almennt um lágar fjárhæðir og hlutfall þóknana var óvenjulega hátt sem bendir til þess að tilgangurinn hafi ekki verið að hagnast á viðskiptunum með lögmætum hætti. Með þessu móti gátu ákærðu stundað viðskipti margsinnis á tímabilinu 26. ágúst til og með 9. október 2020 sem voru til þess fallin að setja fram, auka eða framlengja leitni sem fólst í hækkandi verði á tímabilinu í aðdraganda þess að eignarhluti hinna tengdu félaga í Kviku banka hf. var seldur,“ segir að lokum.