Höfuð­paur tælingarhóps dæmdur í þrjá­tíu og fimm ára fangelsi

Dæmdu mennirnir, sem voru sjö talsins, misnotuðu stúlkurnar ítrekað í bænum Rochdale.

Mohammed Zahid, höfuðpaurinn sem er 64 ára gamall, seldi vörur á markað í Rochdale en þar gaf hann stúlkunum, sem voru þá þrettán ára, nærföt, peninga, áfengi og mat í skiptum fyrir það að hann og vinir hans brutu reglulega á þeim frá 2001 til 2006.

Kasir Bashir (50) var dæmdur fyrir nauðgun og önnur brot og dæmdur í 29 ára fangelsi. Hann er þó ekki í haldi lögreglu, heldur flúði land fyrir réttarhöldin og er ekki vitað hvar hann er staddur.

Mushtaq Ahmed (67) var dæmdur í 27 ára fangelsi. Mohammed Shahzad (44) var dæmdur í 26 ára fangelsi og var Naheem Akram (48) einnig dæmdur í 26 ára fangelsi. Nisa Hussain (41) var dæmdur í nítján ára fangelsi. Roheez Khan (39) var dæmdur í tólf ára fangelsi.

Sky News hefur eftir dómaranum Jonathan Seely, sem kvað upp dóma í morgun, að báðar stúlkurnar hafi verið mjög berskjaldaðar. Þær hafi komið úr erfiðum aðstæðum og hafi verið sérstaklega viðkvæmar gagnvart ágengni dæmdu mannanna, og annarra sem talið er að hafi brotið á þeim.

„Þeim var deilt manna á milli fyrir kynlíf, misnotaðar, niðurlægðar og svo kastað til hliðar,“ sagði Seely. Hann sagði að þeir sem hefðu haft það hlutverk að verja þessar stúlkur hefðu alfarið brugðist þeim.

BBC hefur eftir annarri stúlkunni, sem er nú kona, að hundruð manna hafi brotið á henni á þessum tíma. Hún hafi ekki tölu á því hve margir þeir hafi verið. Þá sagði hún starfsmönnum barnaverndar frá einhverjum brotanna árið 2004 en ekkert var gert.

Hin konan sló á svipaða strengi. Hún sagði að bæði lögreglan og barnavernd hafi vitað af því að verið væri að brjóta á henni en ekkert hafi verið gert. Hún sagðist sjálf hafa séð það árum síðar, þegar hún skoðaði skrár sínar hjá umræddum stofnunum.

Lögreglan á stór-Manchestersvæðinu í Englandi segir að málið sé eitt nokkurra sem hafi verið til rannsóknar að undanförnu. Í heildina sé búið að dæm 32 menn í samtals 474 ára fangelsi vegna sambærilegra brota.