Hætta með spila­kassa á Öl­veri

Sportbarinn Ölver hefur verið starfræktur í Glæsibæ síðan árið 1984. Um árabil hafa gestir getað farið þar í spilakassa, líkt og þekkist á mörgum svipuðum stöðum. Eigendur staðarins hafa hins vegar ákveðið að um mánaðamótin hverfi kassarnir á brott.

„Við höfum tekið ákvörðun um að láta gamlan draum rætast. Að þróa staðinn á þann hátt sem við lögðum upp með í upphafi, að þetta væri hverfisbarinn okkar í gamla góða hverfinu. Félagsheimili úti á landi fílingur með viðburðum, skemmtanahaldi og slíku,“ segir Gylfi Jens Gylfason, annar af eigendum Ölvers. 

Erfið ákvörðun

Tekjur Íslandsspila og Happdrættis Háskóla Íslands af spilakössum árið 2023 námu rétt tæpum fjórum milljörðum króna. Árið 2020 voru tekjurnar tveir milljarðar og því tvöföldun á þremur árum. Spilakassarnir eru afar arðbærir fyrir þá sem reka spilasalina.

„Við erum svona sirkabát lélegustu kapítalistar Íslands. Af mörgum slæmum. Þannig við höfum ákveðið að svara þessu ákalli. Þetta er samfélagsleg ábyrgð okkar að taka þetta. Það finnst okkur. Við höfum viljað koma þessu út, en við viðurkennum það að við höfum ekki gert það hingað til þar sem þetta hefur gefið okkur vel í aðra höndina. En það er komið að stoppi núna,“ segir Björn Hlynur Haraldsson, einnig eigandi Ölvers. 

„Það má eiginlega segja að þetta sé ákvörðun sem er tekin með hjartanu en ekki heilanum. Excel-skjalið mun örugglega blæða í einhvern tíma, en stundum verður maður bara að gera það sem manni finnst rétt,“ segir Gylfi. 

Nóg annað að gera

Rýmið verður nýtt í annars konar afþreyingu fyrir gesti staðarins, til dæmis pílu og billjard.

„Við viljum þróa okkar stað á ákveðinn veg, en hvað aðrir gera verður bara að koma í ljós,“ segir Gylfi.