Aðalsprautan í Pussy Riot fær ís­lenskan ríkis­borgara­rétt

Áður hafa tveir meðlimir hljómsveitarinnar hlotið ríkisborgararétt hér á landi.

Nadezhda er frá Rússlandi, líkt og hljómsveitin og gjörningahópurinn Pussy Riot sem hún stofnaði árið 2011.

Hljómsveitin hefur vakið heimsathygli fyrir pólitískt andóf, sérstaklega í garð Vladímírs Pútín Rússlandsforseta og stjórnvalda þar í landi. Meðlimir sveitarinnar, og þar með talin Nadezda, hafa þurft að dúsa á bak við lás og slá í Rússlandi.

Árið 2012 hlaut hún tveggja ára fangelsisdóm fyrir „óspektir sem byggðu á trúarlegu hatri“ við Kirkju Krists lausnara í Moskvu.

Fyrir tveimur árum hlutu tveir aðrir meðlimir sveitarinnar ríkisborgararétt hér á landi. Það voru þær Mariia Alekhina og Liudmilu „Lucy“ Shtein. 

Athygli vakti í fyrra þegar sú síðarnefnda var dæmd í sex ára fangesli í Rússlandi vegna færslna á samfélagsmiðlum þar sem hún talaði gegn innrás Rússa í Úkraínu.